Foruen pasealekuan autobus geltokia jartzearen aurkako plataforma sortu dute bizilagunek
Egun, Gipuzkoa plazan gelditzen diren autobusak ibai ertzera lekualdatu nahi dituzte. 
Gipuzkoa plazako autobus geltokiak Foruen pasealekura lekualdatzea asmo du udalak. Horren aurrean, Foruen pasealekuko bizilagunek geltokien aurkako plataforma bat sortu dute. Argudiatu dutenez, Gernikako Arbola eta Bizkaia pasealekuekin batera, “Urumea ibaiaren ezkerraldean dagoen zuhaitzez betetako eremu eder bat osatzen du, ukiezina izan beharko lukeena”. Hala izan beharrean, ordea, egungo gobernu taldeak “Donostiako berdeguneak suntsitzeko bidean jarraitzen du”, Zubiri-Manteokoarekin egin moduan; eta herritarrak San Bartolomeko berdegunea edota Zaragoza plazako zuhaitzak eta landaredia babesteko borrokan ari direla gogoratu dute. Hirian dagoeneko “urriak” diren berdeguneak gutxitzen dituzten heinean, proiektu horiek ez dutela ez ingurumenaren ez herritarren osasunaren alde egiten nabarmendu dute.
Autobus geltokiaren proiektuak zuhaitzez betetako ibilbide luze baten suntsitzea ekarriko luke, “balio estetiko eta ekologiko handikoa”, eta halaber, “herritarren artean oso estimatua eta erabilia den” ibilbide historiko baten kontserbazioan eragingo luke. Proiektuari aurre egiteko, donostiar talde batek Foruen pasealekua salbatzeko plataforma sortu dute eta zenbait alternatiba proposatu:
– Gipuzkoa plazako egungo geltokia mantentzea, autobus eta zerbitzu publikoei soilik sarbidea emanez. Argudiatu dutenez, zirkulazioaren eragina txikia litzateke eta oinezkoen eta autobusean arteko elkarbizitza ahalbidetuko luke.
– Pio XII plazan utzitako autobus geltokira lekualdatzea, “bultzada ekonomikorik gabe gelditu den eremu bat biziberrituz”. Udal autobusez gain, Anoetako topo geltokia 5 minutura dago, eta ospitaleetara, Antigua eta Aieterekin lotura ona du.
– Easoko trenbide gunean kokatzea, metro geltokiaren ondoan, hiriko beste guneekin lotura erraztuz.
– Foruen pasealekuko ibaiaren aldean kokatzea geltokia, dagoeneko batzuk dauden lekuan, parkea suntsitu gabe eta egungo itxura mantenduz.
Bestalde, Erdian Bizi elkarteak babesa adierazi dio plataformari, oinarrizko dokumentuarekin bat eginez. 125 urte baino gehiagoko “ibaiertz berdea” —Bizkaia, Gernikako Arbola eta Foruen pasealekuak osatua– “utzikeria” egoeran eta trafiko handiko zirkulazio bidearen menpe dagoela salatu dute, baita udalaren proposamena hiriarentzat “eraso mingarria” dela ere, bere agintariek “iraunkortasunaren eta ingurumenarekiko errespetuaren ikur direla” badiote ere.
Plataformak proposatutako alternatiben artean, Erdian Bizi Easoko trenbide eremuan sortuko den espazio berrian jartzearen aldekoa da, “beste auzoekin konexio ona eskaintzen baitu eta hiriko trafikoa arinduko baitu”.
