Hobeto entzuteko eta erantzuteko ahalegina biderkatuko duela berretsi du udal gobernuak
Jon Insausti alkatea eta Ane Oyarbide alkateordea Ispiluen Gelan egindako agerraldian. Donostiako Udala 
Denboraldi berri bati heldu dio berritutako Donostiako Udal Gobernuak. Goizeko Tokiko Gobernu Batzarrean elkartu dira zinegotziak Jon Insausti alkatearekin eta Ane Oiarbide alkateordearekin batera, arlo guztien kudeaketa gainbegiratu eta agintaldi amaiera arteko proiektuei eta erronkei eusteko. Bien arabera, “lan saio berezi eta intentsua” izan da, arlo guztien kudeaketa gainbegiratu eta agintaldi amaiera arteko bai proiektuei bai erronkei eutsi diete, udal egitasmoei “bultzada berri bat” emateko konpromisoa hartzeaz gain. Horren berri emateko, agerraldia egin dute EAJ eta PSE-EE udal taldeetako buruek udaletxeko Ispiluen Gelan.
Legealdiak aurretik dituen bi urteei begirako asmoak adierazi ditu Insaustik. Alkatearen esanetan, hiri gobernua “sendo” dago eta energia eta jarrera berritua ditu. Duen gehiengoak egonkortasuna eman arren, “grina” sendotasun eta zabaltasun hori handitzea du. Gainera, hiria aldatzen doan heinean, azaleratzen doazen beharrei erantzun behar die, beste erakundeei gauza bera egitea ere eskatuta. Jarrera berritua, aldiz, “hobeto eta gehiago entzun eta erantzun” asmo duelako.
Hiru ardatz
Hitzez haratago, baieztapen horien hiru adibide eman ditu. Lehena, aurrekontuak. “Historiako aurrekontu sozialenak” izateaz gain, udalaren historian lehenengoz, “urtarrilaren 1erako prest” egongo dira. “Bitala da. Hor daudelako jasota gure proiektu eta borondateak; horri esker eskaintzen ditugu zerbitzuak eta eraldatzen dugu hiria”. Azaroan onartuko dituzte, baina aurrez oposizioko hiru alderdiekin negoziatzeko “erabateko borondatea” azaldu du. Joan den ostiralean amaitu zen emendakinak aurkezteko epea, eta, bileretara deitu aurretik, oposizioko taldeen bai osoko zuzenketak bai partzialak aztertuko dituela aurreratu du alkateak.
Bigarrena, berritutako hitzarmenak. Behar berriei erantzuteko, laguntza eta konpromiso eskatuko die gainerako erakundeei, bai Imanol Pradales lehendakariari bai Eider Mendoza ahaldun nagusiari. Hala, urtea amaitu baino lehen, erakunde horiekin dokumentu batean jaso asmo ditu hiri honek dauzkan behar guztiak. Ildo beretik, ostegunean bertan elkartuko da Osasun sailburu Alberto Martinez Ruizekin, goizean, eta Etxebizitza sailburu Denis Itxasorekin, arratsaldean.
Azkenik, hobeto entzuteko eta erantzuteko ahalegina biderkatuko duela berretsi du: “Nik neuk egingo dut hori, eta zalantzarik ez daukat gobernuko gainontzeko zinegotziek berdin-berdin egingo dutela”; eta bi mugarri zehaztu. Batetik, datorren asteazkenean, hilak 12, ateak zabalduko ditu udaletxeko Udalinfo bulegoak. Insaustik sinbolikotzat jo du udaletxearen “oinarrietan” egotea. Bestetik, garaira egokitu eta komunikazio euskarri berriak erabiliko dituzte herritarrei informazioa helarazteko, besteak beste, WhatsApp.
Oyarbideri hitza eman aurretik, orain arteko jarrera eskertu dio eta harreman “sanoa eta konpromisozkoa” dutela nabarmendu. “Hiri honekiko maitasuna eta pasioa partekatzen dugu eta ez dut zalantzarik hori izango dela aurrera jarraitzeko gasolina”. Bat egin du horrekin udaleko PSE-EEko buruak, 2023an sinatutako akordioarekin “abiadura berritu eta indartsuarekin” aurrera jarraitzeko borondatea berretsita. Egindako bidetik nabarmendu du zientzia eta berrikuntza ekosistema baten alde egindako ahaleginak emandako emaitzak, hilabete barru 2026an Berrikuntzaren Europako Hiriburua izateko hiru hautagaietako bat dela zehaztuta. Hori nahi duten hiriaren isla bada ere, herritarrak entzun eta bai hiriko ekonomiak bai hiritarrek egunerokoan behar dutena kontuan hartuko duen udala ere izan nahi dute.
Etxebizitza
Etxebizitzaren arloan izan ditzaketen desadostasunei buruz galdetuta, halakorik ez dela baieztatu du alkateak. Are gehiago, udal gobernuaren asmoa martxan dauden garapen guztiekin jarraitzea eta beste batzuei heltzea dela adierazi du. Hala nola Easoko trenbide ingurua, Loiolako kuartelak edota Auditz Akular. “Argi dugu Auditz Akular dela zehaztu eta ekin behar dugun hurrengo eremua”.
Garapen horiek egin ahal izateko hiri antolamendurako plan orokor berria (HAPO) azkartzearen alde egunotan egindako adierazpenak eskertu dizkio Oyarbidek alkateari; baita Auditz Akularri heltzeko beharrezkoa den behin-behineko moldaketa egiteari buruzkoak ere. “Uste dugu beharrezkoa dela abiada hartzea, azeleragailua zapaltzea, anbizio handiagoa izatea eta etxebizitza proiektu handiak aurrera eramatea”.
