Etxebizitza hutsen kanona «berehala aktibatzea» eskatu du Elkarrekin Donostiak
Donostiako etxebizitza ugari.Joseba Parron San Sebastian 
Elkarrekin Donostiak etxebizitzaren inguruko kontrol mozio bat erregistratu du biharko udalbatzarrerako. Udal gobernuari eskatuko diote “berehala martxan jartzeko” etxebizitza hutsen kanona. Gogoratu dutenez, tresna hori Euskal Autonomia Erkidegoko Etxebizitza Legean (3/2015) aurreikusita dago, eta udalbatzak berak onartu zuen 2024ko ekainean. “Oraindik ez dute ezarri, nahiz eta udalak aspaldidanik baduen hura aktibatzeko beharrezko informazio fiskala”, nabarmendu dute.
Victor Lasa bozeramaileak jakinarazi duenez, hirian 5.522 etxebizitza huts egon litezke, Espainiako Estatistika Institutuaren arabera. “Bitartean, 9.409 pertsona Etxebiden izena emanda daude etxebizitza irtenbide baten zain. Gobernuaren ekintzarik ezak milaka familiei kalte egiten die eta espekulazioa bultzatzen du. Ezin dugu onartu lege tresnak tiraderan gordeta egotea”, deitoratu du Lasak.
Gaur egun, hirian ondasun higiezinen gaineko zergaren (OHZ) %150eko errekargua aplikatzen zaie etxebizitza hutsei. “Ordea, hori ez da kanonaren ordezkoa. 3/2015 Legeak berak bi figurak osagarritzat jotzen ditu eta ez da nahikoa. OHZren errekargua neurri fiskal hutsa da, eta kanona, berriz, neurri ez fiskala da, etxebizitzaren erabilera antisoziala zuzentzea eta etxebizitzak alokairuan jartzera bultzatzea helburu duena. Urtean 1,6 milioi eurotik gorako bilketa izateak erakusten du OHZren errekargua ez dela eraginkorra. Kanona behar da, eta, horretarako, borondate politikoa”, adierazi du Lasak.
Kanonak ondorio positiboak izango lituzkeela dio Elkarrekin Donostiaren bozeramaileak: “Jabeak alokairuan jarri edo saltzera bultzatuko lituzke, eta horrek eskaintza nabarmen handitzen lagunduko luke; era berean, udalak kopuru esanguratsuak bildu ahal izango lituzke, hain zuzen ere etxebizitzarako sarbidea hobetzeko erabiltzeko”.
