Zinema maite du Tabakalerak
Laura Citarellak, Billy Wilderrek eta 'Zinema eta zientzia' zikloak emango diote hasiera 2026ko kultur zentroaren zinema programari.
Joxean Fernandez, Carlos Muguiro, Edurne Ormazabal, Ruth Perez de Anucita, Lur Olaizola eta Josemi Beltran, aurkezpenean.Tabakalera 
Tabakalerak 2026ko zinema denboraldi berria aurkeztu du, zinema gustuko duela agerian utzi. Urtarrilaren 8an abiatuko dute, eta hainbat erakunderen artean diseinatu dute: Donostia Kultura, Donostia Zinemaldia, Euskadiko Filmategia, Elias Kerejeta Zine Eskola eta Tabakalera.
2026ko programak bere helburuari eutsiko dio, Tabakalerako zinema aretora askotariko publikoa erakartzea, alegia. Hartara, programazioak zinemaren eta beste diziplina batzuen arteko elkarrizketa indartuko du, zinema eta musikaren, zinema eta artearen, zinema eta literaturaren eta zinema eta zientziaren arteko intersekzioak aztertzen dituzten ziklo tematikoen bitartez. Gainera, EHUren eta EQZEren parte hartzearekin garatutako programak eskainiko dira.
2026ko programazioari Kontatutako zinearekin emango zaio hasiera, zinemagileen eta ikusleen arteko hurbilketa zuzena sustatzea helburu duen proiektuarekin. Lehenengo saioa urtarrilaren 8an izango da, eta Alberto Gastesi izango da bertan, berriki Sitgesko Zinemaldiko sail ofizialean Singular bere filma aurkeztu duena. Filmaren proiekzioa 17:00etan hasiko da, eta jarraian hitzaldi bat eskainiko da, Gastesik berak filmaren sortze prozesua publikoarekin partekatzeko.
Laura Citarella, Zineb Sedira eta Lucile Hadzihalilovic
Denboraldiko lehen ziklo handia Laura Citarella argentinar zinemagileari eskainiko zaio. El Pampero Cine produkzio etxe ospetsuko kidea (Mariano Llinas, Alejo Moguillansky eta Agustin Mendilaharzurekin batera), Citarellak lau film luze zuzendu ditu, besteak beste, Veneziako edo Donostiako zinemaldietan proiektatu direnak. Zuzendaria Tabakaleran izango da urtarrilaren 15ean, Trenque Lauquen aurkezteko.
Otsailean, Zineb Sedira argazkilari eta bideo artista feminista frantziar-aljeriarrak zentroa bisitatuko du, Tabakaleran eskainiko zaion erakusketaren inaugurazioa dela eta. Garai berean zinema ziklo bat ere antolatu da, Aljeriako eta Marokoko zinemagileak ardatz dituena. Lehenengo saioan, otsailaren 21ean, Zineb Sedira bera izango da bertan, William Klein argazkilari eta zinemagileak zuzendutako Festival panafricain d’Alger 1969 filma aurkezteko.
Apirila eta ekaina bitartean, EQZErekin lankidetzan antolatutako atzera begirako bat eskainiko zaio Lucile Hadzihalilovic zuzendari frantziarrari, Donostia Zinemaldian Zabaltegi-Tabakalera Saria irabazi berri duenari. Zikloak bere filmografia osoa ikusteko aukera emango du, eta irakasle gonbidatu gisa eskolak emango ditu EQZEn.
Hirugarren urtez jarraian, EHUko ikasleak arduratuko dira hilean behin zinema aretoko egitaraua programatzeaz. Gazteak zineman zikloaren hirugarren edizioa urtarrilaren 22an hasiko da, eta pantaila handia ikasleen lehentasunei ireki eta publiko berriak sortzea izango du helburu.
Zinema eta literaturaren arteko harremana aztertzen duen zikloa urtarrilaren 29an hasiko da. Eider Rodriguez idazlea izango da lehen gonbidatua, Claire Denisen Beau travail filmari eskainitako saio batean. Hilean behin, ziklo honek film bat eskainiko du euskarazko azpitituluekin, eta idazle batek euskaraz eginiko aurkezpenarekin.
Bestalde, Zinema eta musika zikloa urtarrilaren 31n itzuliko da saio berezi batekin: Niña Coyote eta Chico Tornado bikotea izango da bertan zuzenean eta solasaldi bat eskainiko dute soinu-banden sortze-prozesuari buruz hitz egiteko.
Nosferatu, Billy Wilder
Nosferatu ziklo berria urtarrilaren 14an hasiko da Tabakaleran eta XX. mendeko munduko zinemagintzak eman duen izen handienetako bati eskainiko zaio: Billy Wilder Erdialdeko Europako zuzendariaren irudiari. El crepúsculo de los dioses (Sunset Boulevard, 1950) filmaren proiekzioarekin inauguratuko da zikloa egun horretan. 2026ko urtarriletik abendura bitartean, 32 film proiektatuko dituzte.
Programazioak ibilbide osatua eskainiko du Wilderren filmografia bikainean zehar: 1930eko hamarkadako Alemanian gidoilari gisa egin zituen lehen urratsak; Frantzian zuzendari gisa egindako bere opera prima —Curvas peligrosas (Mauvaise graine, 1933)— eta AEBn bizi izandako garaia, Ernst Lubitsch, Mitchell Leisen edo Howard Hawks bezalako zinemagile handientzat gidoilari bezala lan egin zuenekoa. Hollywooden zuzendu zuen lehen filma ere, El mayor y la menor (The Major and the Minor, 1942) ikusteko aukera izango da.
Luis Alegre idazle eta zinema kritikaria izango da Billy Wilder. Anatomía de un genio liburuaren koordinatzailea, Nosferatu bildumako 22. zenbakia. Urtarrilean argitaratuko da, zikloaren hasierarekin batera.
‘Zinema eta Zientzia’
Ohi bezala, Zinema eta Zientzia zikloaren edizio berri batekin (oraingoa bederatzigarrena) hasiko du Euskadiko Filmategiak bere urte zinematografikoa. Programa hau Donostia International Physics Centerrekin (DIPC) eta Donostia Zinemaldiarekin batera antolatzen da.
Zikloa urtarrilaren 9an hasiko da eta, ohi den bezala, Pedro Miguel Etxenike DIPCko presidenteak aurkeztuko du. Etxenikek inaugurazioko filma aurkeztuko du: El planeta de los simios (Franklin J. Schaffner, 1968). Lengoaia zinematografikoaren bidez, zientziaren munduarekin lotutako hainbat diziplina eta problematika landuko ditu ziklo honek. Programa osoa laster jakinaraziko da.
Zinema bonua eta sarreren salmenta
Tabakalerako zinema bonua berritu egin da 2026rako, eta 90 eurotan eskainiko du 30 filmetarako sarrera. Bonu honek pantaila partekatuko erakunde bazkideen proiekzioetarako balio du, 2026ko Donostia Zinemaldian programatutakoak izan ezik. Bonuaren erosketarekin batera, aurten ere, Nosferatu Bildumaren bi argitalpenetako bat opari emango da: Dena egiteke dago, zinema tirokatu liburu kolektiboa (Iratxe Fresnedak koordinatua) edo Billy Wilder. Anatomía de un genio liburua (Luis Alegrek koordinatua).
Bonua 2025eko abenduaren 19ko 12:00etatik aurrera erosi ahal izango da, eta salmenta 2026ko urtarrilaren 31ko 12:00ak arte egongo da zabalik. Erosketak eta kudeaketak Tabakaleraren webgunean eta Informazio Gunean egin ahal izango dira. Bonuko sarrerek 2026ko urtarrilaren 1etik abenduaren 31ra arte balio dute.
Aldi berean, urtarrileko proiekzioetarako sarrera arrunten salmenta egun eta ordu berean irekiko da (2025eko abenduaren 19an, 12:00etan). Sarrera arruntak 4.5 euro balioko du. Prezio igoera hori online erosketa bidezko jaulkipen gastuak ezabatu izanak konpentsatuko du. Ohiko deskontuak orain arte bezala aplikatuko dira.
