Agustindarren eraikinetik kanporatuak izango direnentzat baliabideak eskatu ditu EH Bilduk
Martuteneko Agustindarren ikastetxe zaharraren eraikina.Xalba Ramirez 
Zenbait eragilek eta herritarrek atzo ezagurtarazi zuten Martuteneko Agustindarren eraikinean bizi diren 111 lagunak etxegabetuko dituztela ostegunean, abenduaren 4an. Jakinarazpen horren aurrean, EH Bilduk Udal Gobernuari eskatu dio kaleratzean tentsio uneak ekiditeko bitartekoak jartzeaz gain, hala izan dadin ahaleginak egitea ere. Zentzu horretan, “ezinbestekotzat” jo du hirugarren sektoreko langileen eta erreferentziazko pertsonen parte hartzea ahalbidetzea eta bermatzea etxegabetzean.
Desalojoaz gain, haren ondoren 111 lagun horiek nora joango diren ere kezkatzen ditu. “Azpimarragarria da desalojo hau gertatuko zela lehenago jakin arren Udalak ez egin izana, denbora eta lasaitasun gehiagorekin, bertan lotan zeuden pertsonekin esku hartze bereziturik”. Alderdi abertzaleko kideek jakin dutenez, haietako batzuk hiriko beste toki batzuetara joaten hasi dira, kale gorrian lo ez egiteko. “Jakitun al da Udal Gobernua honek tentsionatutako toki horietan sortu edo biderkatu ditzakeen arazoez, elkarbizitzari eta giza-duintasunari dagokionean?”. Hori horrela, kanporatutako pertsonei balibideak eskaitzeko ardura hartzea, La Siren irekitzeko aukera mahai gaineratu du alderdi abertzaleak.
Udalak EFE agentziari egindako adierazpenetan baieztatu du kaleratuak izango direnak artatzeko baliabideak emateko duen asmoa. “Udalak zaurgarrienei arreta emateko betebeharra du baita artatuak izan nahi dutenei ere, arretarik nahi ez duen jendea baitago”. Hala, Gizarte Ekintzako langileak egoerari irtenbide bat eman nahian lanean ari dira.
Agustindarren eraikina beste aukerarik ez duten askoren lotarako tokia izan da azken urteetan. 2024ko uztailean ezagutu zen Ortzadar fundazioak erosi zuela eta bertan hezkuntza proiektu bat jarriko duela.
