Istiluak izan dira Voxek Intxaurrondon egindako ekintzan
Ertzaintza jardueraren aurka ostiral arratsaldean elkartu ziren herritarrei oldartu zitzaiela salatu du Bloke Askeak.
Bloke Askeak hedabideei bidalitako idatzi batean azaldu duenez, atzo iluntzean hainbat lagun batu ziren Vox-ek Sagastieder plazan jarritako informazio puntuak kezkatuta. “Auzoaren mezua argia zen: Intxaurrondon ez dugu faxistarik nahi, ez hemen ez inon”. Aipatu testuan jasotako kontaketaren arabera, 17:00etan iritsi ziren auzora Voxeko kideak, “irain eta probokazioen bitartez jendeari oldartuz, Ertzaintzaren konplizitate osoarekin”. Poliziek auzoa “erabat militarizatu” zuten, hamabost ibilgailu bertaratu, haur parkeak itxi eta terrazak jaso zitzaten “presionatuz” plazako tabernariak. Gainera, elkarretaratzea amaitzean, “bertaratutako antifaxisten aurka kargatu zuten borra, babes eta foam jaurtigailuak erabiliz hainbat herritar zaurituz”. Hala, une “arriskutsu eta tentsua” sortu zuten, “furgoneta bat plazan sartu eta jendeari oldartuz”.
Segurtasun Sailak EFEri esandakoaren arabera, Ertzaintzak “zenbait salba” egin zituen eta txanodun batzuek gauzak bota zizkieten ertzainei, haietako sei kolpatuz. Istiluen ondorioz, gazte bat atxilotu zuten poliziek “desordena publikoengatik”. Bloke Askearen esanetan, berriz, hainbat herritar zauritu ziren istiluetan, eta eragileak gaitzetsi egin du Ertzaintzak auzotarren “sumin zilegizkoaren” aurrean izandako erantzuna.
