«Torturaren inpunitatea» gaitzetsi dute Zabalza eta Fuentes kasuetan
Raul Fuentes eta Mikel Zabalzaren kasuen eragileen "inpunitatea" salatu du Euskal Herriko Torturatuen Sareak. Maitane Aldanondo 
Euskal Herriko Torturatuen Sareak agerraldia egin du larunbat goizean Bulebarreko kioskoan, Mikel Zabalza eta Raul Fuentesen kasuak adibidetzat hartuta, “torturaren inpunitatea” salatzeko. Amaia Urizarrek irakurri duen euskarazko idatzian adierazi duenez, “itxi gabeko zauri sakona” da eta aipatu bi kasuak duela zenbait hamarkada gertatu baziren ere, oraindik “bizi-bizirik” diraute.
Raul Fuentes Villota preso donostiarrak aste honetan eskatu du bera toturatzen parte hartu zuten Bilboko Indautxuko komisariako Espainiako polizia nazionalen kontra jarritako salaketa berriro irekitzea. 1991ean atxilotu zuten eta inkomunikazio aldian “bortizki torturatu” zutela salatu zuen. Aurtengo apirilean, NBEn Toturaren Kontrako Batzordeak haren testigantza sinesgarritzat jotzeaz gain, Espainiako Estatuari leporatu zion kasua ikertu ez izana. Azaldu dutenez, ofiziozko jardunik ez denik abiarazi, Euskal Herriko Giza Eskubideen Behatokiak bide emango dio. Sareak Fuentesek hartutako erabakia babestu du “torturaren aitortza kolektiboaren aldeko borrokan egia, justizia eta erreparaziorako bide berriak irekitzen dituen ekimen bat delako”, eta espero dute bide hori baliagarra izatea “Espainiako Estatuaren hainbat aparatuk tortura politikoaren aplikazioan izan duten erantzukizuna estaltzeko eraikitako inpunitatearen harresia arrakalatzeko”.
Aipatu inpunitatea “erabatekoa” izan dela nabarmendu du Urizarrek eta horren adibide “lazgarrienetako” bat Mikel Zabalza Garate orbaizetarrarena da. 1985ean atxilotu zuen Guardia Zibilak eta Intxaurrondoko kuartelean jasandako torturaren ondorioz hil zen. Hego Euskal Herriko erakunde nagusiek Espainiar Estatuko indarkeriaren biktima gisa aitortu badute ere, ez dute “kontakizun osoa azaleratu”. Hau da, zer gertatu zen zehazki, non, nork egin zuen, nola… “Galdera horiek ofizialki erantzuteke daude oraindik”. Horregatik, abian den Mikel Zabalza Gogoan dinamikari bultzada eman nahi izan diote, kasuaren memoria bizirik mantentzea eta erantzukizunak galdegitea da xede dituena.
Horri lotuta, abenduaren 14an Dbuseko langileek Bulebarrera ekarriko duten autobusari harrera egin eta ibilaldia amaitzeko 12:30ean gauzatuko duten ekitaldi nagusian parte hartzera deitu dute jendartea.
