65 urtetik gorako 13.500 pertsona bakarrik bizi dira Donostian
Jon Insausti alkatea, Jatorra jubilatuen klubean.Donostiako Udala 
Donostiak Udalaren datuen arabera, hirian 65 urtetik gorako 13.500 pertsona inguru bizi dira bakarrik beren etxeetan —%74 emakumeak dira–. Hau da, hirian bakarrik bizi diren pertsonen %50 inguru —26.942–. Egoera horretan pertsona gehien dituen auzoa Erdialdea da, eta, bigarren, Amara Berri.
Nahi ez den bakardadearen egunaren atarian, Jon Insausti Donostiako alkatea Erdialdeko Jatorra adinekoen egoitzan izan da. Egoera zaurgarrian dauden adinekoentzako Goizaldiak eguneko udal arreta zerbitzura astero joaten diren pertsonekin elkartu da.
“Oso pozgarria izan da gure adinekoengandik gertu egotea, haien kezkak eta beharrak entzutea, baina baita aktibo jarraitzeko eta gizarteari ekarpenak egiten jarraitzeko gogoa ere”, azaldu du alkateak. “Ariketa garrantzitsua izan da hau Donostia bere gizarte politiketan norabide egokian doala berresteko, bere herritar ahulenak babesteko baliabideak bideratuz beren benetako eskaerei erantzunez”, gaineratu du.
Nahi ez den bakardadea adinetik haratago badoa ere, adinekoak dira eragin handiena duten sektoreetako bat; izan ere, egoera sozial hori narriadura fisiko edo kognitiboa gisako faktoreei gehitzen zaie, eta horrek bereziki kaltebera bihurtzen ditu.
Adineko zaurgarrienei arreta
Udalak hainbat zerbitzu eta programa ditu donostiarrek zahartze aktiborako behar dituzten baliabide guztiak izan ditzaten, beren bizi kalitateari ahalik eta denbora gehien eusteko eta beraien ingurunean ahalik eta denbora gehien egon daitezen.
Zehazki, Goizaldiak hiriko zortzi auzotan eskaintzen den eguneko arreta zerbitzua da: Erdialdea, Amara, Larratxo (Altza), Gros, Antigua, Egia, Intxaurrondo eta Bidebieta. Bere helburua da adinekoek beren autonomia mantentzea eta beren ohiko ingurunean jarraitzea, gizarteratzeko aukera emanez, isolamendu egoerak konpentsatzeko.
2025ean, 88 pertsonak erabili dute zerbitzu hori. Zerbitzu horren profila honako hau da: mendekotasun arriskuan edo egoeran dauden 65 urtetik gorako pertsonak, aitortu gabeko mendekotasuna edo mendekotasun arina duten baina hauskortasun egoeran dauden 75 urtetik gorako pertsonak, eta isolamendu, bakardade, abandonu eta zaintza desegokia izateko arriskuan dauden 65 urtetik gorako pertsonak.
Goizaldiak programak esku-hartze hezitzaile eta psikosoziala eskaintzen die pertsona horiei, harreman sozialak eta integraziokoak sustatzeko, osasun kognitiboa prebenitzeko eta errehabilitatzeko, osasun fisikoa sustatzeko edo aisialdia jokoekin eta eskulanekin estaltzera bideratutako jardueren bidez. Besteak beste, talde jarduerak egiten dira; gimnasia egokitua, erlaxazio tailerra, eskuzko terapia, tailer ludikoak, memoriakoak eta ikus-entzunezkoetakoak edo musikoterapia.
