Udalak 357.000 euro bideratuko ditu 2026an Otorduak II programara
Bazterketa egoeran dauden pertsonei eta familiei zuzendutako elikadura programaren aurrekontua onartu du Udal Gobernuak
Donostiako Udalak 357.000 euroko aurrekontua onartu du 2026an Otorduak II programarako. Horren bidez, bazterketa egoeran dauden pertsonek Udalaren laguntzaile deklaratu diren taberna, jatetxe edo ostalaritza-zentroetan jan ahal izango dute. Gainera, aurrekontu hori handitu egin daiteke laguntzaren onuradunen kopurua aurreikusitakoa baino handiagoa bada.
Jon Insausti alkateak azpimarratu duenez, partida hau “gaur goizean egindako ohiz kanpoko udalbatzarrean onartutako 2026ko aurrekontuaren barruan dago, eta horri esker 40,5 milioi euro bideratuko dira Gizarte Zerbitzuetara. Horrek esan nahi du aurrekontu soziala % 8,3 handitu dela 2025. urtearekin alderatuta, eta horrek beste behin ere erakusten du Udal Gobernu honek konpromisoa duela donostiar bakar bat ere atzean ez uzteko, hirian bere bizi-proiektua gauzatzeko bultzada behar duten pertsonei baliabideak emanez”.
Otorduak II programaren helburua da, zehazki, gizarte-trebetasun nahikoak dituzten etxerik gabeko pertsonei eguneroko elikadura nahikoa eta egokia bermatzea, gune normalizatu bat (hala nola jatetxeak eta bestelako ostalaritza-zentroak) partekatzeko, eta horrek estigmatizaziorik gabeko ingurune batean integratzen laguntzen die.
Nahiz eta elikadura ez den udaleko Gizarte Zerbitzuen prestazio propioa, baizik eta osagarria, lehen mailako premia da zalantzarik gabe. Donostiako Udalaren ustez, beharrezkoa da aukera sorta bat ezartzea, pertsonek elikadura modu desberdinean eskura dezaten, beren trebetasunen eta egoera sozial, ekonomiko edo erresidentzialaren arabera.
Horregatik, gai horri heltzeko estrategia diseinatzerakoan, garrantzitsua da ikuspegi integral bat izatea, kontuan hartuta, halaber, bazterkerian dauden pertsona horien sozializazio- eta integrazio-premiak, gainerako herritarrekiko erlazio horrek mesede egin baitiezaieke, eta hori beren bizitzan aldaketak bultzatzen dituen palanka bat izan daiteke.
