San Telmo museoak hamar artelan jaso ditu dohaintzan, tartean, Txillida, Martiarena eta Barojarenak
Garcia Ramos familiaren dohaintzaren aurkezpeneko irudia.San Telmo museoa 
Donostiako Garcia Ramos familiak bederatzi autoreren hamar artelan eman dizkio dohaintzan. Atzo, horren berri emandako agerraldian azaldu zutenez, zortzi olio, akuafuerte bat eta zeramikazko eskultura bat dira, Julian Tellaetxe, Aurelio Arteta, Alejandro Tapia, Carlos Marcote, Gaspar Montes, Arturo Acebalen eta Eduardo Txillida, Ricardo Baroja eta Ascensio Martiarena donostiarrenak.
Emaileen gurasoek urtetan sortutako bildumaren zati bat da. Artearen zaleak ziren, ohikoak ziren erakusketatan, galeriatan eta enkanteetan, eta harremanak zituzten sektoreko artista eta profesionalekin. Koadroak erosi eta saltzen zituzten, eta urteen poderioz familiaren bilduma handitzen joan ziren.
Jasotako obren artean museoak dohaintzaren interes artistiko eta dokumentalaren erakusgarri gisa hautatu ditu Barojaren La maestra de Oscoz, Artetaren Recolección de manzanas eta Tellaetxeran Descargando en el puerto. Artetaren eta Tellaetxeren lanen kasuan, obrak erreferentziazko bi autorerenak dira, hala euskal artearen historian nola penintsulako artean. Beren obra museo aipagarrienetan eta bilduma korporatiboetan dago. Barojaren lanaren kasuan, bere kalitateaz gain, nabarmentzekoa da piezaren balio dokumentala, lantzen duen gaiarengatik.
Barojaren piezan tropa militarrek neska gazte bat gauez atxilotzen duten unea erakusten du. Ilargi-argiak ilunki argitutako plaza baten erdian, tropa erreketeek itxura hauskorreko emakume ilehori gazte bat zaintzen dute, eskuak lotuta dituena. Bitartean, kapote militar batez estalitako irudi ilun batek atxilotuta dagoela esaten dio, eta eskuaz adierazten dio ezkerretara dagoen kotxe batera igo dadila. Eszenaren atzealdean dauden bizilagunek gertaera izuturik ikusten dute. Seguru aski, koadro honekin Barojak Maria Camino Oscoz Urriza Nafarroako Gorza udalerriko maistraren historia kontatzen du. Alderdi Komunistako kidea izan zen, 1936ko uztailaren 31n atxilotu zuten eta urte bereko abuztuaren 10ean epaiketarik gabe erail zuten. Gainera, maistra gaztea Pio eta Ricardo anaien ezaguna zen, gerra aurreko urteetan haiekin harreman epistolarra izan baitzuen.Indar adierazkor handiko lana da, bere interes artistikoari Nafarroako Gerra Zibileko gertakari tragiko baten balio historiko garrantzitsua gehitzen diona.
Museoetako bildumak handitzeko oso ohikoak dira norbanakoek, erakundeek, elkarteek… egindako dohaintzak. Azken urteotan, San Telmok dohaintza ugari jaso ditu artearen eta dokumentazioaren esparruan. Horien artean daude Sigfrido Koch Bengoetxearen eta Sigfrido Koch Arrutiren argazki funtsa, Antton Elizegieta Fernando Postigoren argazki bildumak, Amable Ariasen Antzoki Zaharra akuarela saila, eta Remigio Mendiburu eta Rosa Valverderen obra grafikoa. Era berean, Cristina Iglesiasek kobrearen gainean azidoarekin serigrafiatutako lau pieza eman zizkion udalari, museoaren bilduman sartu zirenak, horiek ondo kontserbatu eta zabaltzeko. Santa Klara uhartean dagoen Hondalea instalazioarekin lotutako obrak dira.
