Insaustik Uberri eskatu dio Donostiako zerbitzua «eraginkorra, eskuragarria eta euskarazkoa» izatea
Jon Insausti alkatea, udaletxeko prentsa aretoan.Donostiako Udala 
Iragarri moduan, Jon Insausti alkateak bilera egin du gaur goizean Uber enpresako ordezkariekin, udaletxean. Donostian ematen hasi diren zerbitzuen inguruko azalpenak jaso ditu alkateak, eta eskaera zehatz bat egin dio Uberri; hirian ematen duten zerbitzua “eraginkorra, eskuragarria eta euskarazkoa” izan dadila.
Gainera, Donostian lanean hasteko lege esparruari buruzko informazio zabala eta zehatza eskatu dio Uberri. Konpainiak konpromisoa hartu du dokumentazioa emateko, udaleko zerbitzu juridikoek azter dezaten.
Udalak operadore guztiei arau berberak aplikatu behar zaizkiela defendatu du alkateak, eta eskumena baldintza berdinetan eta arau esparru argi baten barruan garatzen bada bakarrik izan daitekeela bidezkoa uste du.
Bilera ostean, udalak berretsi du lehentasuna dela donostiarrek “pertsonen garraiorako ahalik eta zerbitzu onena” izan dezatela bermatzea; “alegia, zerbitzu segurua, kalitatezkoa, eskuragarria eta eraginkorra”. Insaustik, halaber, euskararen erabilera bermatzeko hizkuntza osagaia gehitu du.
