Gazteei emantzipazio prozesuetan laguntzeko zerbitzua izango du Kontadoresek
Kontadoresen GAZ zerbitzua jartzeko hitzarmena sinatu dute udalak eta Jaurlaritzak.Donostiako Udala 
Udalak eta Jaurlaritzak lankidetza hitzarmena sinatu dute GAZ bulego bat –Gazte Ibilbideak Abiarazteko Zerbitzua— irekitzeko Kontadoresen. Bulego hori erreferentziazko zerbitzu publikoa da gazteei emantzipazio prozesuetan laguntzeko. Aurrez aurreko arreta pertsonalizatu eta doakoa eskainiko du, GAZen online zerbitzua osatuz, eta Gazteen Emantzipaziorako Euskal Sarea indartuz. Programa garatzeko aurreikusitako aurrekontua 315.023,65 eurokoa da, %51,48 Donostiako Udalak finantzatu du, gainerakoa, Eusko Jaurlaritzak. 2026an eta 2027ko lehen seihilekoan gauzatuko da.
Donostian bizi diren, ikasten ari diren, lan egiten duten edo bizi proiektua bertan garatu nahi duten 16 eta 34 urte bitarteko gazteei zuzenduta dago zerbitzua. GAZ bulegoak informazioa, orientazioa, bitartekaritza, aholkularitza eta laguntza emango ditu funtsezko eremuetan, hala nola enpleguan, prestakuntzan, etxebizitzan, mugikortasunean, ekintzailetzan eta gizarte baliabideetan.
Hitzarmenak aukera emango du hirian proiektu proiektu integral pilotu bat garatzeko Donostian, gazteriaren arlotik gazteen emantzipazioa erraztera bideratua eta gazteen parte hartze aktiboarekin, trantsizio sozial eta demografiko testuinguru batean. Halaber, emantzipazio politika publiko berriak diseinatu, ebaluatu eta sistematizatzeko espazio bat ere bada, Euskadiko beste udalerri batzuetara transferitzeko moduko ikaskuntzak lortzeko
“Emantzipazioa gure gazteen erronka handietako bat da. Zerbitzu hori beren bizitzako une garrantzitsu batean laguntzeko sortu zen, Donostian beren bizi-proiektua eraikitzeko benetako tresnak eskainiz. Gazteak hemen geratu, hazi eta garatu ahal izatea nahi dugu, eta proiektu hau urrats erabakigarria da norabide horretan”, adierazi du Gazteria zinegotzi Iñigo Garciak.
Aurrez aurreko zerbitzuaz gain, proiektuak programa osagarriak jasoko ditu, esaterako, Martx-Up; baita parte hartzeko laborategiak eta espazioak ere, sormena, enplegagarritasuna, bizitza independentea, osasuna edota konpromiso komunitarioa sustatzeko.
