Agerraldia egin du Insaustik ertzain eta udaltzainburuekin, delitu kopuruak jaitsi egin direla ziurtatuz
Gaur goizean, Segurtasuna Koordinatzeko Batzordea egin dute Donostiako Udaltzaingoak eta Ertzaintzak. Bilera Udaltzaingoak Morlansen duen egoitza nagusian izan da, eta bertan Jon Insausti alkatea izan da. Besteak beste, Udaltzaingoko eta Ertzaintzako buruek, Bingen Zupiria Eusko Jaurlaritzako Segurtasuneko sailburuak eta Martin Ibabe Segurtasuneko zinegotziak parte hartu dute.
Bilerak Ertzaintzaren eta Udaltzaingoaren arteko polizia-lankidetzaren ereduari balioa emateko balio izan du; izan ere, aitzindaria da Donostian, eta mugarri garrantzitsuak ditu: patruila bateratuak, prestakuntza planak eta Egiako komisaria proiektua, non bi poliziak elkarrekin lan egingo duten.
Jaitsiera orokorra
Udalak eskaini dituen arabera, 2025ean, 15.150 delitu presentzial gertatu dira hirian, aurreko urtean baino datu nabarmen txikiagoa (-%5,18), 15.978 delitu izan baitziren 2024ean. Horietatik guztietatik, % 45,32, 6.866 delitu hain zuzen ere, lapurretekin lotu dira; hirian gehien errepikatzen den delitu modalitatea da. Hala ere, zifra hori nabarmen jaitsi da (-% 10,07) 2024koaren aldean, orduan 7.635 ebasketa erregistratu baitziren Donostian.
Ondarearen aurkako beste delitu batzuek ere, hala nola indarra erabiliz egindako lapurretek, beherakada handia izan dute (-% 6,5), 2024an, 2.154 izatetik, 2025ean, 2.014 izatera igaro baitira. Aipatzekoa da, halaber, ibilgailuen lapurreten kapituluan izandako % 23,49ko jaitsiera nabarmena (114, 2025ean, eta 149, 2024an).
Balio absolututan, Ondarearen aurkako Delituak eta Ordena Sozioekonomikoarekin lotutakoak % 7,9 jaitsi dira, 12.143tik 11.183ra. Pertsonen Aurkako Delituei dagokienez, homizidio bat erregistratu da 2025ean, eta beste zazpi saiakuntza-mailan, % 25,93ko jaitsierarekin kategoria orokorrean.
Ordea, dena ez dira datu positiboak: sexu askatasunaren aurkako delituak % 9,40 hazi dira. Sexu erasoen atalean jaitsiera dago (-%2,84), 141 kasutik 137ra. Aldiz, sexu askatasunaren aurkako beste arau hauste batzuk igo egin dira 8tik 26ra.
Azkenik, nabarmentzekoa da delitu informatikoek % 16,24ko igoera izan dutela: 2024an 2.556 salaketa izan ziren, eta 2025ean 2.971.
