DIPCri Ibaetako lursaila 75 urtez ematea onartu du udalak
DIPCen egoitza.Wikipedia 
Tokiko Gobernu Batzordeak bi erabaki berri hartu ditu, zientzia eta ezagutza hiriaren norabidean. Lehenengoa, Illunbeko hirigintza eremuari dagokion Hiri Antolamenduko Plan Orokorraren aldaketa puntuala idazteko zerbitzua kontratatzeko espedientea onartu izana da, 54.483 euroko aurrekontuarekin eta gehienez 18 hilabeteko egikaritze epearekin.
Jon Insausti alkateak nabarmendu duenez, “gutxi erabiltzen den ingurune hori egokitzeko izapidearekin hasten gara, erabilera anitzeko pabilioira eta polo bioteknologikora sarbide hobea sortuz, eta, horrela, Illunbe zientziaren eta ikerketaren esparruan abangoardiako eta erreferentziazko leku bihurtuz, Miramongo Parke Teknologikoa zabalduz, gure hirira talentu gehiago erakartzeko”.
HAPOaren aldaketa hau lehen izapideetako bat da “bide trazadura berria garatu ahal izateko, hirugarren sektoreko lurzatiaren eraikigarritasuna handitzeko, eta konexio eta sarbide berriak, aisialdirako espazio zabal bat eta aparkaleku berri bat diseinatzeko”.
DIPC-ri lagapena, 75 urtetarako
Udalak onartutako beste izapide bat, eremu zientifiko teknologikoaren aldeko norabidean, Ibaetako lurzatia Donostia International Physics Center Fundazioari (DIPC) azalera eskubidearen lagapenaren hasierako onarpena da. Lurzati horretan du egoitza ikerketa publiko pribatuko zentroak hirian.
Lagapen hori 75 urterako emango da, eta lurzatia hartzen duen proiektuaren egitura izaerari eta epe luzekoari erantzuten dio, bai eta eraikin berria eraikitzeko egindako inbertsio publiko garrantzitsuari ere.
