Jardueraz loratuko da udaberria, Gladys Enean
Ingurumen Baliabideen Etxea, Gladys Enean. 
Udaberriaren etorrerarekin batera, Cristina Enea Fundazioak datozen hiru hilabeteetarako jarduera eskaintza zabala aurkeztu du, herritarrak ingurumenarekin eta jasangarritasunarekin konektatzera gonbidatuz. Horretarako, erakusketak, natur irteerak, hitzaldiak eta bestelako jarduerak antolatu dituzte.
Aurtengo udaberri donostiarra, gainera, berezia izango da; izan ere, ekainaren 2an 100 urte beteko dira Gladys Enea parkea herritarrentzat ireki zutenetik. Mendeurrena ospatzeko, hala, Donostiako Udalak bi bisita mota antolatuko ditu ekainean, parkearen historia eta ondarea ezagutarazteko asmoz.
Jarduera eskaintza oparoa
Udako programazioaren barruan, fundazioak kudeatzen dituen hiru ekipamendu nagusiak aldi berean egongo dira irekita: Cristina Eneako Ingurumen Baliabideen Etxea, Ulia Interpretazio Zentroa eta Urgulleko Natur Txokoa. Horrez gain, Santa Klara uharteko Hondalea obrak ere bisitariak jasoko ditu.
Erakusketen artean, martxoaren 27an irekiko dute Elkarrizketa bat paisaiarekin erakusketa, Cristina Eneako Ingurumen Baliabideen Etxean. Bertan, Aurora Bengoechearen lanak egongo dira ikusgai ekainaren 14ra arte. Artistak, bere garaian, ingurumenaren aldeko mezua zabaldu zuen, kutsaduraren eta hiriaren inpaktuaren inguruko lanen bidez.
Bestalde, Aste Santu eta Pazko astean jarduera bereziak antolatu dituzte, hala nola Añarbeko urtegira eta Loiolako araztegira bisitak edo Urumea ibaian kanoaz egiteko irteerak.
Ohiko moduan, Urgulleko Natur Txokoa irekita egongo da martxoaren 30etik apirilaren 12ra, haurrentzako tailer eta jarduera didaktikoekin. Gainera, Uliako Interpretazio Zentroak ere eskaintza berezia izango du oporraldian, Oporrak naturaz blai! egitarauaren bidez, apirilaren 2tik 6ra.
Jarduera guztien informazioa eta izen-emateak Cristina Enea Fundazioaren webgunean daude eskuragarri.
