Koldo Casla donostiarra Nazio Batuetako Etxebizitzari Buruzko kontalari berezi izendatu dute
Koldo Casla donostiarra. 
Nazio Batuetako Giza Eskubideen Kontseiluak Koldo Casla irakasle donostiarra Etxebizitza Egokiari Buruzko kontalari berezi izendatu du, berriki. Hiru urtez edukiko du kargu hori Caslak, eta beste hiru urtez luzatu daiteke. Balakrishnan Rajagopal estatubatuarrak eduki du kargu hori orain arte.
Kontalari bereziak etxebizitzarako eskubidearen garapen progresiboa sustatzeko zeregina du, praktika onak eta irtenbide bideragarriak identifikatuz, baita eskubide hori gauzatzeko erronkak eta oztopoak identifikatuz ere. Nazio Batuetako Kontalari bereziek mundu osoko herritarren banakako kexak jasotzen eta kudeatzen dituzte, eta behaketa eta jarraipen misioak egiten dituzte giza eskubideak tokiko eta nazio mailan betetzeko.
Zuzenbide irakaslea
Casla 1985ean jaio zen, Donostian, eta Nazioarteko Giza Eskubideei buruzko Zuzenbidea irakasten du Essexeko Unibertsitatean (Erresuma Batua). Giza eskubideei, nazioarteko eskubideei eta nazioarteko harremanei buruzko 30 argitalpenen baino gehiagoren egilea da. Errefuxiatuen aldeko NBEtako agentzia den UNHCR erakundearentzat, NBEko Giza Eskubideen Bulegoarentzat eta Amnesty Internationalentzat aholkulari gisa lan egin du, eta giza eskubideen aldeko hainbat erakunderekin estuki lankidetzan aritu da, bai lokalak bai nazionalak eta nazioartekoak ere.
Horrez gain, King’s College Londonen Nazioarteko eta Europako Ikasketetan doktoretza du, Denverreko Unibertsitatean Nazioarteko Harremanetan Fulbright masterra, Essexeko Unibertsitatean Giza Eskubideen Teoria eta Praktikari buruzko masterra eta EHUn Zuzenbidean lizentziatura. Era berean, Arartekoko kabinete burua izan zen 2011 eta 2013 bitartean.
“Nazio Batuen giza eskubideen sistema unibertsalarentzat une kritikoak bizi ditugu, gobernuen eta lider politiko eta ekonomikoen erasoen foku zuzena. Gaur egun inoiz baino premiazkoagoa da nazioarteko zuzenbideak eskaintzen dizkigun baliabideak erabiltzea etxebizitzarako sarbidea giza eskubide gai gisa globalki sustatzeko. NBEtako kontalari berezi izendapena ohore handi gisa jasotzen dut, baina batez ere erantzukizun itzel bezala”, adierazi du Caslak.
