Donostia Sutan 2025
Azken hamabost urteotan egin dugun moduan, aurten ere, abuztuaren azken egunotan saiatuko gara 1813an, hemen, Donostian, gertatu zen sarraskia salatzen.
Donostia Sutan 1813 elkartea duela hamabi urte pasa sortutako elkarte kulturala da eta elkarte horren eginkizuna, hemen, Donostian, 1813.urtean, abuztuan zer gertatu zen ahalik eta modu argienean eta pedagogikoenean hiritarrei, batez ere, belaunaldi berriei jakitera ematea da.
Donostia hiribildua zen 1813an eta gerra napoleonikoen garaia zen Europan. Testuinguru horretan, Donostiako sutea eta hiriaren suntsiketa, non 1.500 lagun hil zituzten, gertatu zen.
Sinesgaitza dirudien arren, duela urte gutxi arte, sarraski hau, existitu ez balitz bezala, ezkutuan egon da interesak egon direlako horrela izan zedin. Urteetan, Abuztuaren 31 kalean, iluntzean eta modu xumean, baina duinean, gogoratu izan da azken urteotan. Hortik at, frankismo garai ilunean «Aliatuek» eta hauen etsai frantsesek egindako sarraskia goraipatzeko desfile militarrak eta efemeridearen ospakizun plakak ipintzeko balio izan du, baina ez pentsa urteak joan eta urteak etorri ospakizun ofizialak asko aldatu direnik. Izan ere, gaur egun ere, guk salatzen segitzen ditugun desfile militarrak ez dira falta. Gainera, kanpotik ere horretara prestatuta etortzen den jendea ez da falta. Eta, egun udalean agintea dutenak nahiz eta abertzaleak diren, desfile militaristak ez dira falta.
«Ez pentsa urteak joan eta urteak etorri ospakizun ofizialak asko aldatu direnik. Izan ere, gaur egun ere, guk salatzen segitzen ditugun desfile militarrak ez dira falta»
Donostia Sutan 1813 elkartea orain arte egin izan den eta egiten segitu nahi den desfile militarraren aurka gaudelako sortu genuen, besteak beste, izan ere, desfile militar nazkagarri hori ezin da inola ere ontzat jo gaur dakigunarekin.
Horregatik segituko dugu gure ikuspegia azaltzen jendeari. Horretarako sortu dugu bloga, non urteotako informazioa aurkituko duzuen. Halaber, bertso saioak antolatzen, berripapera ateratzen, hitzaldiak eta antzerkia egiten, kalean panel informatiboak jartzen eta abar segituko dugu.
Dena dela, esan beharra dago, gure aurretik, egon zirela beste batzuk, bidea erakutsi zigutenak. Ezin utzi aipatu gabe: Antonio Mendizabal Etxeberria psikiatra, istorio honetan maisu izan zena, ez eta ere Josu Tellabide etnologoa, edo Iñaki Egaña historialaria eta Jose Antonio Azpiazu eta abar. Pertsona hauek izan ditugu maisu. Hauez gain, aipatu behar dugu Juan Karlos Izagirre eta bere alkate garaia, oso oparoa izan baitzen aipatzen ari garen sarraski honetan zer gertatu zen jakin genezan herritarrok, 79 testigantza liburuarekin, besteak beste.
