Jone joan da
Jone joan da eta etxeko telefonoari ez diot erantzuten jada…
Bizitza aldatu egiten da, telefono mugikorren ugaritzeak etxebizitzetan telefono finko gutxi geratzea ekarri du. Gazteen etxeetan, dagoeneko ez dira erabiltzen aparatu horiek, eta oraindik ere erabilgarri dirauten etxeetan telefonoei mesfidantzaz begiratzen zaie jotzen dutenean, haien hariak merkataritza eskaintza desegokiak edo azaltzeko zailak diren inkestetan laguntzeko proposamenak ekartzen dituztelako, betiere, desorduetan.
Baina nik telefono finkoari erantzuten nion deitzailea Jone Forcada izan zitekeelako, filosofo frantses bati buruz galdezka, proposamen literario baterako aholkua eskatuz, jarduera politiko jakin bat kritikatuz, laguntza eskaeraren bat zela medio edo gai atzeraezin bati buruzko erreklamazio baten beharra konpartitzeko…
«Gugan biziko da, haren itzala eta gertutasunaren aztarna utziz betiko. Bai, bizitza aldatuz doa, Jone. Heriotza ere bai. Etxeko telefonoak alferrik joko du hemendik aurrera»
Ez dut inoiz jakin nola lortu zuen nire etxeko telefonoa joan den mendeko 80ko hamarkadan (neroni bigarren aldiz kartzelatik irtenda, eta mehatxu telefoniko ugari jaso ohi nituenez, beraz, ez genuen gure telefono zenbakia erraz partekatzen), baina aparatua altxatu nuenean, Joneren ahotsetik, orduan Zorroagan zegoen Filosofia eta Hezkuntza Zientzien Fakultatean lan egiten nirekin, Arbonan bildutako euskal gose grebalariak bisitatzeko eskatu zidan. Ordutik aurrera, haren deiak (nire mugikorraren zenbakia inoiz ez zuela izan uste dut) ustekabekoak bezain iradokitzaileak izan ziren beti… joan den astera arte.
Baina orduko Zorroagako euskararen arloan lan egin aurretik, Jone lehen ikastolen hastapenetan egon zen, Hegoaldean nahiz Iparraldean, eta garai hartan euskal komunitate autonomoko hezkuntza sare publikoko ijito eskolak deiturikoetan edo Goierrin ingeles irakasle gisa ere lan egin zuen, besteak beste.
Joneren heriotzak huts handia utzi du euskal komunitatean. 92 urteko andereño eredugarri eta jakintsua izan da, belaunaldi askoren irakasle eta gidaria. Bizitzarekiko grinak eta ikasteko zaletasunak bere ingurukoak inspiratu zituen beti. Eskuzabala, irribarretsu bezain duina eta entzuteko pronto zegoena, hiltzeko moduan ere adibide izan dena. Gugan biziko da, haren itzala eta gertutasunaren aztarna utziz betiko.
Bai, bizitza aldatuz doa, Jone. Heriotza ere bai. Etxeko telefonoak alferrik joko du hemendik aurrera.
