Kaixo 2011!
Gorka Etxeberria, bertsolaria
Sukaldeko egutegia biluztu egin da berriro ere, pixkanaka orri guztiak isuri ditu eta berriari tokia utzi dio. Horrelakoetan, jendeak, gauzak eskatzen dizkio urte berriari zerbait desberdina ekarriko duelakoaren esperoan. Nik ez dut inongo gimnasiotan izenik emango. Baina badaezpada nik ere desioak eskatuko ditut.
2011. urtean Gipuzkoako bertso txapelketa izango da berriro. Duela lau urte, G puntua Ilunben zegoela ikasi genuen eta aurten ea zer ikasten dugun. Eskatzea libre delako, duela lau urte, Hernaniko saiotik atera nintzen sentsazio berdinekin atera nahi dut aurtengo saioetan.
2011. urtean ere osasunari zerbait eskatu beharrean nago. Azkeneko bi hilabeteak bajan pasa ditut nire txorkatilak ez daudelako nik nahi bezala. Etxetik ere osasuna gutxitan pasatu da bisita egitera. A zer urtea! Muxu handi bat amona, segi borrokan irabazten zoaz-eta. Niretzat eta etxekoentzat osasuna.
2011 urtean etxean ikusi nahi zaituztet Julen, Arkaitz eta Aratz. Eta etortzen ez bazarete gauza gehiago eskatu behar dizkiot urte berriari. Lehenik eta behin, zuei idazteko alperkeri gutxiago. Gero ere, ea azkenean baimena ematen didaten zuei bisitatzera joateko. Baina beno, etxera bazatozte hobeto. Muxu handi bat zuei. Eta ez utzi ohitura zaharrak galtzen. Segi ostegunetan kroketarena egiten eta Piliren semearekin gogoratzen. Biba zuek!
2011. urtean krisitik ateratzeko urtea izatea espero dut. Jende askok iaztik soilik hitz egiten du krisiaz, baina bagaude asko, krisia ez den egoera ez dugula ezagutu. Horregatik eskuzabala bazara astero kiniela botatzen dudala esango dizut badaezpada oparitxoren bat egin nahi baldin badidazu.
Beno, hau guztia ekarri nahi ez baldin badidazu, gauza bakarra eskatuko dizut, 2010. urtea baino hobea izan zaitezela orduan. Oso gauza erraza da.
Irutxuloko Hitzako langile eta irakurle guztiei ere urte ona opa dizuet.
