Euskaltzaindiak Euskararen Corpusa aurkeztu du Bilbon, IRUTXULOKO HITZA partaide izanik
Euskaltzaindiak Euskararen Erreferentzia Corpusa (EEC) aurkeztu du gaur Bilbon, Akademiaren egoitzan. Proiektuaren lehen lagina argitaratu da eta erabiltzaileen esku dago jada, hementxe.
Zein da EECren helburu nagusia? «Analisi linguistikorako, ikasketa automatikorako edo hizkuntza ikerketetan hipotesiak baliozkotzeko tresna funtsezkoa da, baina baita hizkuntza, literatura edo ikerketa helburuetarako corpus estandar edo erreferente gisa erabil litekeena ere. ‘Egungo’ egoera islatzen duen neurrian, hizkuntzaren irakaskuntzan jarduten dutenek, zuzentzaileek… erabilgarri izango dute EEC, lexiko (orokorra zein terminologikoa) eta gramatika zalantzak argitzeko, eta, jakina, corpus handi horietarako eredu egokiak balioztatzeko ere bai», nabarmendu du Miriam Urkia euskaltzain osoak.
Gaur argitaratutako bertsioak 123.124 dokumentu, 154,21 milioi testu-hitz eta 129.817 lema biltzen ditu, 2000. urtetik hasi eta 2023ra bitartean euskaraz idatzitako edo ekoitzitako testuetatik hartuak, tartean IRUTXULOKO HITZAk urte hauetan guztietan zehar egindako testuak egonda.
