Altzako emakumeen elkarteak: Emakumeen Astea
Antxon Alfaro
Joan den mendeko 70eko eta 80ko hamarkadak aktibismo sozial handiko urteak izan ziren. Elkarte ugari sortu ziren: kirol klubak, auzo elkarteak, elkarte gastronomikoak, gazte zentroak, aisialdi taldeak… Baina baita gaur egun ezagutzen ditugun emakume elkarteak ere -Ostadar, Uztai Belar, Elkarte Berri-. Aste honetan zehar Emakumeen 41. Astea ospatzen ari dira.
Lau hamarkada hauetan zehar, hiru [...]
Antxon Alfaro
Joan den mendeko 70eko eta 80ko hamarkadak aktibismo sozial handiko urteak izan ziren. Elkarte ugari sortu ziren: kirol klubak, auzo elkarteak, elkarte gastronomikoak, gazte zentroak, aisialdi taldeak… Baina baita gaur egun ezagutzen ditugun emakume elkarteak ere -Ostadar, Uztai Belar, Elkarte Berri-. Aste honetan zehar Emakumeen 41. Astea ospatzen ari dira.
Lau hamarkada hauetan zehar, hiru elkarteek lan handia eta etengabea egin dute, auzoko bizitzan aztarna sakona utziz. Hasieratik hainbat tailer eta ikastaro jarri zituzten martxan, eta beren dantza taldeak sortu zituzten; talde horiekin urtez urte parte hartu dute Emakumeen Astean eta auzoko beste hainbat ekitalditan. Lehen urteetan jostun-kooperatiba bat ere bultzatu zuten, animatzen zituen espiritu ekintzaile eta solidarioaren isla. Baina haien jarduera formatiboa eta ludikoa baino askoz haratago joan da: hitzaldiak, antzerki emanaldiak, zinema emanaldiak eta bideo-forumak, erakusketak eta solasaldiak antolatu dituzte, betiere berdintasuna eta emakumeen ahalduntzea ardatz hartuta.
Emakumeen Astea (1990)
Ahalegin horren guztiaren emaitzarik ikusgarriena, zalantzarik gabe, Altzako Emakumeen Astea da, martxoan ospatzen dena Emakumeen Nazioarteko Egunaren inguruan, eta Donostialdean antolatzen diren guztien artean zaharrena dela aitortua. Edizio bakoitzak bere leloa izaten du, aurtengoan “Helduaroa, adinik onena”, eta Larratxoko Kultur Etxean programa askotarikoa biltzen du: antzerkia, hitzaldia eta bideo-foruma. Urtez urte hausnarketa bizikidetzarekin eta ospakizunarekin uztartzen jakin duen hitzordua.
Bere historia hiru elkarteek batera argitaratutako artikulu batean jaso zen, Altza Hautsa Kenduz bildumaren IX. zenbakian (2007). Gainera, Altzako Tokiko Bilduman Emakumeen Aste ezberdinetako bideo ugari gordetzen dira, programekin, kartelekin eta jardunaldi hauen lekuko diren beste dokumentu batzuekin batera
Aurtengo edizio honen harira, Hilari Pagazaurtunduari egindako elkarrizketaren zati bat eskaintzen dugu. Bertan, elkarte hauek 80ko hamarkadan izan zuten hasieraz hitz egiten digu.
Argazkian klikatu bideoa ikusteko
Elkarrizketa “Lekukoak” proiektuaren barruan egin zen. Proiektu horrekin, AHM-Altzako Historia Mintegitik, XX. mendean zehar Altzan gertatu ziren gizarte-prozesu ezberdinen berreskurapena, zainketa eta hedapenean lagundu nahi dugu. Esteka honen gainean klikatuz elkarrizketan landutako gai guztien bideoak ikus daitezke.
