Bertso Hackatoia, teknologia eta bertsolaritza uztartzen dituen ekitaldia
ARTEK[LAB]ek eta Eusko Ikaskuntzaren Asmoz Fundazioak antolatutako ekitaldia abenduaren 14an izango da, BadaLaben
Bertso Hackatoiaren kartela 
Bertso Hackatoiaren lehenengo edizioa ospatuko da abenduaren 14an BadaLaben, Errenterian. Ekitaldiaren antolatzaileak Jaime de los Ríosek zuzentzen duen ARTEK[LAB] eta Eusko Ikaskuntzaren Asmoz Fundazioa dira. Bertso Hackatoia, goizeko 11:00etan hasi eta arratsaldeko 16:00ak aldera amaituko da. Bertsolaritza eta teknologia nahasten dituen ekitaldia da eta bi gaiak uztartzen dituzten hitzaldiak eta tailerrak egongo dira.
Hitzaldiak 11:00etatik 13:30ak bitartean eskainiko dira; guztira 5 izango dira, bakoitza 30 minutuko iraupenarekin eta arduradunak bertsolariak, artista digitalak, musikariak eta programatzaileak izango dira, batez ere. Gainera, hitzaldien artean denbora-tarteak egongo dira bertaratutakoen artean aurkeztutako gaiei buruzko hizketaldiak emateko.
Tailerrak 11:00etatik ekitaldiaren amaiera arte luzatuko dira (16:00ak arte). 5 tailer egingo dira guztira eta Bertso Hackatoira gerturatzen den pertsona orok parte hartu ahal izango du, tailer interaktiboak baitira. Hitzaldietan bezala, bertsolaritza, musika eta teknologiarekin harremana duten pertsonak egongo dira tailer bakoitzaren atzean. Gainera, Xenpelar Bertso Eskolak egingo duen bertso paper lehiaketaren sari banaketa Bertso Hackatoiaren parte izango da.
Hitzaldien arduradunak hauek izango dira:
- Kepa Matxain “Datorkigun bertsogintzaz: susmo lurtar batzuk”
- Leire Palacios eta Izaro Arruti (BadaLab) “Joxepa Antoni Aranberri”
- Jon K. Sanchez “Meta-bertsoak: olerkigintza kultura digitalean”
- Antuxuna “Pozik emango dizuet eskatu ezkero”
- Violet.AI “Egin zure A.I.”
Tailerrei dagokienez, hauek izango dira gonbidatuak:
- Xenpelar Bertso Eskola “Bertso paper sariak”
- Poetry attack “Hitzak adierazpide gisa erabiltzen dituen erresistentzia fenomenoa”
- Malen Barrutia “Bertso Khipu”
- Tunipanea “EKHO: ahotsari eta beste instrumentu batzuei erreakzionatzen dien automata musikala”
- Urban 13 Kolektiboa “Urban 13 Bertso Rap”
Informazio gehiago, hemen: https://bertsohackatoia.hotglue.me
