Axier Jaka, Juan Karlos Izagirre eta Josu Ruiz. (Argazkia: Agurtzane Altuna)
Igeldo Gipuzkoako 89. udalerria bihurtzeak Donostiako Udalean sortu duen “zalaparta” ikusirik, ez ohiko bilkura bat egingo dute alderdi politiko guztien kezkak eta ekarpenak eztabaidatzeko. “Igeldok bilera berezi bat behar duela uste dugu, eta horregatik erabaki dugu urtea amaitu aurretik ez ohiko bilera bat egitea. Aukera egokia da denon artean Igeldo herri bihurtzeak dituen ondorioez lasaitasunez hitz egiteko”, esan du Juan Karlos Izagirre alkateak.
Zentzu horretan, Gipuzkoako Foru Aldundiaren erabakiaren aurrean “arduraz eta lasaitasunez” jokatu behar dela uste du Izagirrek, eta halaxe eskatu die gainerako alderdiei ere.
Abenduaren 27an, 13:00etan egingo dute ez-ohiko udalbatzarra eta Axier Jaka, Partaidetza zinegotziak hartuko du hitza. Legeak agintzen dion neutraltasunari eutsiz, Izagirrek ez duela datorren asteko batzarrean parte hartuko aurreratu du.
Donostia eta Igeldo
Igeldori herri izaera onartuta “ariketa demokratiko” bat egin dela uste du Izagirrek eta “naturaltasunez” hartu behar dela erabakia. Zentzu horretan, Igeldorekin gaia “puztutzen” ari dela uste du Izagirrek. “Herritarren borondatea entzun da, eta herritarrek erabakitakoa errespetatu da”, esan du Izagirrek; “Guk errespetatzen dugu gehiengoaren nahia, eta gure diskurtso politikoarekin koherentziaz jokatzen dugu gainera”, gaineratu du.
Dena dela, Igeldo herri bihurtzeak Donostian ondorio zuzenak izango dituela onartu du alkateak, eta udal gobernuak “Donostiaren interesak defendatuko dituela beti” azpimarratu du. Izan ere, Foru Aldundiaren erabakia zehazten duen Foru Dekretuan onartzen ez dituzten puntu batzuk badirela onartu du Izagirrek. Igeldok ez duela Donostiaren zorra bere gain hartuko dio Dekretuak, adibidez, eta udal gobernua erabaki horren aurka agertuko dela adierazi du Izagirrek; “Igeldotarrek dagokien zorraren zatia ordaindu beharko dute”.
Igeldo herri bihurtu bada ere, zerbitzu eta kudeaketa erabaki batzuk zehaztu gabe daude oraindik. Bi udalen arteko harremanetan itxi gabe geratu diren gai guztiak zehazteko arbitraje kontseilu bat sortuko dute. Igeldoko hiru ordezkarik, Donostiako Udaleko beste hiru ordezkarik eta Foru Aldundiko Garbiñe Errekondok osatuko dute kontseilua.
