Nora Galparsoro, Azpiegitura zinegotziak edukiontzi marroiaren berri eman du. (Argazkia: Agurtzane Altuna)
Nora Galparsoro, Hiri Azpiegitura eta Zerbitzuetako zinegotziak gaur aurkeztu du edukiontzi marroia hiri osoan ezartzeko kanpaina. Materia organikoa sailkatzeko txip bidezko edukiontzi marroia oinarri duen sistema aitzindaria izango omen da hiriburuen artean. Sistema honen bidez Donostia inoiz iritsi ez den birziklatze tasetara iritsi nahi dute: “Egun birziklatzen dugun % 30etik 2016an % 60ko tasara iristea da helburua”. argitu du Galparsorok; “herritarrek Donostia jasangarriagoa nahi dute, eta denon konpromisoarekin, helburuak lor ditzakegu”, azpimarratu du.
‘Hemen da Konposta’ kanpaina
Hauxe izango da bosgarren edukiontziaren erabilera bultzatuko duen kanpainaren leloa:
Hemen da konposta. Zero zabor filosofiari jarraituz, zabor gutxiago sortzea da udal gobernuaren helburua, eta sortzen dena ahalik eta neurri handienean berrerabiltzea.
Galparsorok azaldu duenez, “materia organikoa, orain arte neurri handi batean hondakin gisa galtzen dena, erabilgarri bihurtzen ahaleginduko dira. “Sukaldeko hondakin organikoak ez baitira zabor, baliabide baizik”, esan du Galparsorok. Hala, hondakin organikoak bildu eta bereizitakoan, landu eta konposta egiten da, ondoren nekazaritzan, lorategietan eta obra zibilean erabili daitekeen ongarri bihurtuz.
Uztailerako jarriko dituzte edukiontziak
Edukiontzi marroiaren pixkanaka jarriko dute hiriko auzo guztietan. Martxoaren hasieran, egokitzapen fase batekin hasiko dira Amaran eta Grosen. Izan ere, bi auzo hauetan dagoeneko erabiltzen dute bosgarren edukiontzia, baina sistema eta edukiontziak egokitu egingo dituzte.
Apirilean, faseka ekingo diote edukiontzia hiri osoan hedatzeari. Guztira, lau fasetan osatuko delarik ezartzea.
-1. fasea: Gros, Sagues, Erdialdea, Egia, Amara, Amara Berri, Morlansen eta Anoeta.
-2. fasea: Ategorrieta-Ulia, Mirakruz-Bidebieta, Aiete eta Antigua.
-3. fasea: Añorga, Miramon-Zorroaga, Altza eta Intxaurrondo.
-4. fasea: Loiolako Erribera, Parte Zaharra, Ibaeta, Loiola, Martutene eta Zubieta.
Fase bakoitzak bost asteko iraupena izango du, eta elkartu egingo dira, uztailerako edukiontzi marroiak hiri guztian jarrita egongo direlarik. Guztira 450 edukiontzi jarriko dituzte. Gainera, fase bakoitzean sentsibilizazio eta informazio kanpaina bat egingo du Udalak, herritarrek sistema nola erabili behar duten ikas dezaten, eta erabiltzera anima daitezen. Auzo guztietan izango dira herritarrei azalpen zehatzak emango dizkieten monitoreak, kalean jarriko diren informazio guneetan.
Itxura hau izango dute edukiontzi marroia erabiltzeko txartelek. (Argazkia: Agurtzane Altuna)
Herritarrek bost pauso jarraitu beharko dituzte sistema honetan izena emateko. Lehenik, txartela eskatu behar dute
Jokogarbia.donostia.org webgunean, 010 telefonoan edo Udalinfo bulegoetan.
Izena eman ondoren, etxean jasoko dute txartela, norbere datuak izango dituena. Hasiera batean, txartel bakarra emango dute familiako, baina gero herritar bakoitzak bere txartela edukitzeko aukera izan dezake.
Txartelarekin batera, materia organikoa modu erosoan jasotzeko materiala banatuko dute: ontzia eta poltsa konpostagarriak. Izan ere, materia organikoa poltsa konpostagarrietan sartzea beharrezkoa da ondoren kalean izango den edukiontzi marroiean botatzeko. Poltsa konpostagarriak banatzeko makinak ere jarriko dituzte poltsa gehiago behar dituztenentzat.
Familia edo etxe bakoitzak bere txartelarekin ireki behar du edukiontzi marroia. Txartelak gertutasun sistema erabiltzen duen txipa darama barnean. Astean hirutan jasoko dute materia organikoa, baina herritarrek edozein egunetan eta ordutan bota ahal izango dute zakarra. Bildutako materi organikoa Bergara edo Azpeitiko guneetara eramango dute.
Edukiontzi marroia xartel bidez erabilita, informazio asko bilduko dutela esan du Galparsorok. Hala, egoki birziklatzen duten herritarrek hobariak jasoko dituzte, baina neurri horiek ez omen dituzte zehaztuko bilketa sistema hiri osora hedatu arte.
Gaur aukeztu dituzten arren, txartelak ezingo dira eskatu, norbere auzoan informazio kanpaina egin eta edukiontzia jartzen duten arte. Dena dela, bitartean sor daitezkeen zalantzei erantzuteko
jokogarbia@donostia.org helbidea erabiltzeko gonbita egin dute.
