Parte Zaharrean pilatutako zaborrarekin kezkatuta daude bizilagunak

Aritz Sorzabal

2015/07/18

Edukiontzi bat, gainezka. (Argazkia: Parte Zaharrean Bizi)

Parte Zaharrean Bizi auzo elkarteak bere kezka azaldu du, auzoan pilatzen ari den zaborra ikusita. «Joan den maiatzeko udal hauteskundeen ondoren, zabor metaketa kezkagarria ikusten dugu Parte Zaharrean. Era guztietako zabor-poltsak, etxebizitzetako lanetako hondarrak eta dendakoak ere, kartoiak… begibistan daude Aldamar kalearen bilketa puntu guztietan», adierazi du elkarteak.

Edukiontziak «ia beti» bete-bete eginda daudela ohartarazi du, eta goizetik gauera inguruan zaborra dagoela salatu dute, hondakin organikoa barne. «Udalak dendari eta ostalaritzaren artean banatzen dituen poltsa horiak protagonista nagusiak dira», esan du. Konstituzio plazaren sarrera, San Vicente, San Juan, Kainoietan, Sarriegi plaza, paperontzien inguruak, Bretxa, McDonald’s… hainbat «puntu beltz» daudela jakinarazi du. «Ez da hasiera ona egungo udal gobernuarentzat», erantsi du.