Piratek Donostia abordatu dute

Aurten ere 350 baltsa inguru atera dira kaitik, jai herrikoiak aldarrikatuz

Estitxu Zabala

2015/08/10

Ehundaka baltsek abordatu dute aurten ere Donostia. (Argazkia: Estitxu Zabala)

Hamahirugarren urtez jarraian Kontxako badia abordatu dute Donostiako Piratek, Abordatze erraldoi baten bidez. Guztira, 350 baltsa eta 3.000 Pirata inguru uretaratu dira kaian, arratsaldean. Hain zuzen ere, 17:00etan, Xibaro kofradiaren ardurapean dagoen Ezkila kapitainak jai herrikoiak aldarrikatu ditu, eta ondoren, Mattik txupina bota du, IRUTXULOKO HITZA ordezkatuz. “Mugimendua gero eta zabalagoa eta handiagoa da, eta oso pozik gaude. Abordatzea oso jarduera garrantzitsua da guretzako, baina ez da bakarra. Egitaraua oso zabala da, jende askok hartzen du parte eta antolakuntzan lagun asko gabiltza”, azaldu du Piraten mugimenduko Aiert Ordoñezek. Zehazki, larunbatean eman zioten hasiera ofiziala Aste Nagusi Piratari, eta Abordatzea izan da urtero legez, jarduerarik jendetsuena. Beraz, Pirata guztiek ongi pasatzeko aukera izan dezaten, boluntario askok lan egin behar izaten dute. “200 lagun lanean aritzen gara, suhiltzaileekin, DYArekin eta urpekariekin elkarlanean”, gehitu du Ordoñezek. Edonola, argi dago sekulako eboluzioa izan duela Piraten mugimenduak: “Donostia desberdin bat, jaiak egiteko era desberdin bat aldarrikatzen dugu, eta mugimenduak izan duen eboluzioa izugarria izan da. Lehen bi urteetan hamar baltsa irten ziren, jendea aspertua zegoen Aste Nagusiaren modeloarekin, eta yatez betetako Kontxa abordatu nahi dute”. Txandaka antolatu dira Piratak, goizean goizetik hasita. Hala, 8:00etan hasi dira kaiko arranpa inguruan lanean Pirata goiztiarrenak, euren baltsak muntatzeko. Zuloaga plazan elkarrekin bazkaldu dute 600 Pirata inguruk, behin muntaketa lanak bukatuta, bertako garaiko produktuez gozatuz. Arratsaldean, haizea izan da Piraten etsai bakarra, eta baltsa batzuk kai inguruan geratu behar izan dira, ezbeharrik ez izateko.