Eskubide zibil eta politikoak defendatzeko hainbat mobilizazio egingo dituzte
Askapenaren epaiketaren harira, astelehenean izango da lehenengoa, hainbat herritan egingo diren elkarretaratzeen bitartez.
Antiguako frontoian egin dute agerraldia. (Argazkia: Lide Ferreira)
Salbuespen politikak
“Nolatan da posible argazki hau 2015eko urrian? Salbuespen politiken, salbuespen legedien eta salbuespen epaitegien beharra borroka armatuak justifikatzen omen zuen; baina urteak dira gure herrian existitzen den biolentzia politika antolatu bakarra instituzionala dela“, adierazi du Zearretak. Gainera, Espainiako estatuak disidentziaren aurkako arma gehiago aurkezten jarraitzen duela salatu dute: Mozal Legea eta Zigor Kodearen erreforma, besteak beste. “Disidentziarako eskubidea bera ukatzen digute. Gure esku dago ukazio horiek gainditzea”. Denboraren poderioz, borrokak eta praktika orokortuak delitu zen hori eskubide bihurtzen dela erakutsi dietela diote: “Boteretsuek ez dute inoiz gogo onez onartu pertsonok eta herriok geure burua gobernatzen saiatzea, objektu pasibo izateari utzi eta subjektu aktibo bilakatu nahi izatea. Eskuratu dezagun, beraz, oparituko ez digutena; behartu ditzagun salbuespen iraunkorrean gure eskubideak errespetatzera“. Unai Vazquez Askapeneko kideak adierazi duenez, auziperatuek epaiketak eta espetxeratzeak otzantasunez eta etsituta onartzea nahi du Estatuak, baina ez dutela hala egingo ziurtatu du, eta euren ustezko delituak aldarrikatzen jarraituko dituztela: internazionalismoa, indepentziaren alde egitea, bakearen, feminismoaren, sozialismoaren, preso eta errefuxiatuen eskubideen edo dena delakoaren alde. “Oinarrizko eskubideak praktikatzeagatik epaitzen gaituzte; eta, guztion eskubideak izanik, guztion ardura da horien alde egitea”, dei egin du Vazquezek.Udazkena laranjaz tindatuko dute
Hortaz, auzipetuen, Eleak-Libreren eta herritarren arteko auzolanak Euskal Herriko udazkena laranjaz tindatuko du. Askapenaren epaiketaren harira, astelehenean elkarretaratzeak egingo dituzte hainbat herritan (Donostiakoa 19:00etan izango da, Bulebarrean); azaroaren 14 eta 15eko asteburuan jarduera ugari antolatuko dituzte Euskal Herriko herriko tabernetan; eta, Segurako sarekadan atxilotuak izan zirenen aurkako epaiketa ere azaroan hasiko da, eta orduan ere izango dira bestelako deialdiak. “Erasoen aurrean, defendatu ditzagun guztion artean guztionak diren eskubide zibil eta politikoak. Asko gara ideia horrekin bat egiten dugunok, baita Euskal Herritik kanpo ere”, adierazi du Zearretak. Hain zuzen ere, gaur bertan Madrilen manifestazio bat aurkeztu dute hainbat eragilek, Euskal Herriarekiko elkartasuna adierazteko, eta epaiketa politikoen aurka. Horregatik, urriaren 31n Madrilera joateko deia egin dute.
