Zemoria kaleko eraikina betetzeko prozesu parte hartzaile bat abian jarri dute

Kortxoenea gaztetxearen aldeko manifestazioak jendetza erakarri du; 2.000 lagun inguru izan dira gaurko mobilizazioan.

Nerea Lizarralde

2015/11/07

Autogestioaren eta gaztetxeeen eredua babestu dute gaur ehunka lagunek Donostian. Bulebarretik abiatu dira, eta Erdialdea zeharkatu ondoren, Kortxoenea gaztetxera iritsi dira. Handik Zemoria kaleko eraikinera joan dira. Ekainean hutsik geratuko da, eta eraikinaren kudeaketari begira, parte hartze prozesu bat planteatu zioten udalari. Gaur protestan adierazi dute bertan ospatuko dutela Kortxoenearen 6. urtemuga, 2016ko ekainaren 26an. Prozesu parte hartzaile bat abiatu dute eraikina betetzeko, hau eraikina auzoari zabaltzeko aukera ezin hobea dela uste dute, eta honekin aurrera jarraitu nahi dutela berretsi dute. Eraikin hori udalarena da berez, baina 2000. urtean Eusko Jaurlaritzako Hezkuntza Sailari utzi zitzaion 10 urterako. Gaur egun, Uliako institutua dago bertan, baina lagapena amaiturik legoke. Deialdia zabaldu nahi dute astelehenean arratsaldeko 19:00etan Nafarroa Behera plazan egingo duten asanblada irekira joateko. Parte hartze deia luzatu dute gaur eta 17ra bitartean egingo dituzten jardueratan parte hartzeko. Dultzaineroek eta Groseko jaietako erraldoiek girotu dute manifestazioaren burua. Hiria herritarrentzat, Kortxoenea bizirik lelopean abiatu dute protesta arratsaldean. Zemoria kaletik Sagueseko zabalgunera joan dira, eta bertan zuzenean aritu dira Joseba B. Lenoir eta Borrokan, eta Herederos del Hip Hop ere emanaldi bat ematekoa zen. Kortxoeneari buruzko albiste guztiak irakur ditzakezu lotura honetan.

Azken bideoak