Iparraldeko hainbat artistak Seaskantuz kantaldia eskainiko dute

Viktoria Eugenia Antzokian zuzenean arituko dira larunbatean, Erramun Martikorena eta Aire Ahizpak, besteren artean.

Estitxu Zabala

2015/11/19

Begiz Begi taldeko Xabi Etxeberri, Ikastolen Elkarteko presidente Koldo Tellitu, Eneko Goia alkatea eta Seaskako presidente Paxkal Indo. (Argazkia: Estitxu Zabala)

“Artistei esker bizi izan dira hainbat eta hainbat ikastola Ipar Euskal Herrian”, goraipatu du Seaskako presidente Paxkal Indok. Izan ere, musutruk aritzen dira maiz artistak ikastolen aldeko kontzertuetan, eurentzako dirua biltzeko, eta oraingoan ere hala izango da. Seaskantuz ikuskizuna eskainiko dute Iparraldeko hainbat artistak Viktoria Eugenia Antzokian, larunbatean, 20:00etan. Erramun Martikorena, Mixel Ducau eta Caroline Phillips eta Aire ahizpak arituko dira zuzenean, beste hainbat artistekin batera. Kortzertuak helburu bikoitza izango du. Batetik, Donostiako publikoari iparraldeko hiru probintzietako kantari onenak ekartzea, eta bestetik, ikastolen behar ekonomikoei aurre egiteko dirua biltzea. Ikuskizunerako sarrerak salgai daude, Donostiakultura.com webgunean, 10, 12 eta 15 eurotan. Kontzertuko partaideak:

Erramun Martikorena: Klasikoak bihurtu diren bere kantuak eskainiko ditu.
Bidaia (Mixel Ducau eta Caroline Phillips): Folk kantuak eskainiko dituzte.
Aire ahizpak: Xalbadorren abesti ezagunak abestuko dituzte, eta beren sorkuntza berriak ere sartuko dituzte.
Zuberoko kantariak: (Bordaxar, Luro, Pinque, Urruty eta Larrandaburu): Zuberoko mendietatik zuzenean iritsiko dira, euren arbasoen kantugintzaren magia pizteko asmoz.
Bilaka Dantza kolektiboa eta Begiz Begi taldea: Musika eta dantza nahasten dituen sorkuntza berria eskainiko dute bi talde lapurtarrek.
Amaia Riouspeyrous: Donibane Garaziko kantari gazteak iaz kaleratu zuen bere bakarkako diskoa. Euskal Kantu Txapelkeraren irabazlea izan zen, eta bere kantu politenak eskainiko ditu.
BBAX: Pantxix Bidart eta Mirentxu Aguerrek hirukote berezia osatu dute Marie Bidarte ethnomusikologoarekin batera.
Kattalin Indaburu: Behe Nafarroako kantaria.
H-Eden: Marri Zubeldia kantariaren talde lapurtarra.