Hemendik aurrera alerta laranjan dago hiria, olatu handiengatik.
Maria Kristina zubiaren baranda hautsi egin da olatuen eraginez. (Argazkia: @DYAGipuzkoa)
Goizaldeko 3.00etatik 7.00etara indarrean egon da alerta gorria kostaldean, itsasgora 5.20ean izan baita. Hain zuzen, goizeko bostetan
bederatzi metroko olatuak izan direla jakinarazi dute. Zenbait puntutan itsasoak gainezka egin du, baina jarraipena egiten ari den mahai teknikoak jakinarazi du,
kalte larririk ez dela sortu. Donostiako Udala denboralearen eragina aztertzen ari da.
Segurtasunagatik Kursaal eta Mundaiz zubiak itxi dituzte. 08:00etarako Kursaal zubia ireki dute berriz.
Parte Zaharrean, hainbat lokal eta garajetan sartu da ura. Zuloaga plazako aparkalekua izan da kaltetuena, eta 7:00ak arte ezin izan dute bizilagunek euren autoa bertatik atera. Pasealeku Berrian zatiren bat ere hautsi da. Horretaz gain, olatuen indarrak Maria Kristina zubiko barandaren zati bat hautsi du. Ondarretan, Tenisean ura sartu da.
2014an ezarri zuten azken aldiz alerta gorria kostaldean, baina gaurkoa, oraingoz, ez dirudi hain larria izan denik. Hiritarren Segurtasun eta Babes Zibileko zinegotzi
Martin Ibabek adierazi du kalteak materialak direla: “Inor ez da zauritu.
Kalte materialak aztertzen ari gara orain. Gau zaila izan da, baina segurtasun neurriek funtzionatu dute.
Egoera nahiko egonkortuta dago orain, baina arratsaldean beste itsasgora handi bat dator”.
Alerta gorria pasa da, eta alerta laranjarekin jarraituko dute bihar goizalderarte.
Olatu handiak, sei metrokoak, espero dituzte gaur arratsaldean 15:00ak eta 20:00ak bitartean.
Udalak eskatu du arretaz ibiltzeko, eta moztuta dauden guneak errespetatzeko.
Pasealeku Berria, Perla, Ondarreta eta Mundaiz eta Maria Kristina zubiak izan dira kaltetutako gune garrantzitsuenak
Olatuak, Eguzki klubaren aurka. (Argazkia: Tolosako Herri Babesa)
Parte Zaharrean, Abuztuaren 31 kalean eta Zuloaga plazan ura sartu da, baina hasierako balorazio batean eta azterketa sakonagoa egin aurretik,
ez da kalte larririk egon denda eta etxebizitzatan, segurtasun neurriak bete dira-eta. Pasealeku Berrian bertan, itsasoak hiri altzariak apurtu ditu. Hala ere, azterketa sakonagoa egin ahal izango da bertara sartzeko segurtasun neurriak bermatzen direnean.
Ondarretako Pasealekuan eta Eduardo Txillida pasealekuan olatuek hiri-altzariak apurtu dituzte eta kabina kolektiboetan zein Tenis Klubeko instalazioetan kalteak sortu dituzte. Horiek guztiak azterketa sakonago baten zain daude.
Kontxako Pasealekuan, ura Rotonda dantzalekuko instalazioetan sartu da eta kalte handiak sortu ditu. Arrapalan barandila zati bat ere eraman du. Halaber, La Perlan kalte handiak egon dira bai kirol instalazioetan bai bertan dauden taberna eta jatetxean, nahiz eta segurtasun neurriak hartu diren.
Mundaiz, Maria Kristina eta Lehendakari Agirre zubiak izan dira kaltetuenak. Kursaaleko zubia itxita egon da goizaldeko hiruretatik zortziak arte, baina une honetan irekita daude, Kursaaldeko autobusentzako bidea izan ezik.
Itsasgorarekin, ibaiak ere gora egin du eta gainezka egin du Urkiko biribilgunean,
Txomin Eneako haur parkean eta kartzelaren atzealdean. Bertan, garbiketa zerbitzua lanean ari da.
Denboraleak eragindako kalteen irudi bilduma osatu dugu.
