"Arduragabekeria hutsa"
Uliako mintegietako hirigintza proiektua baztertzeko eskatu du auzo elkarteak. Parkea ezagutzeko gonbidapena luzatu diote udal gobernuari; Azkarate izan da bisitatzen lehena
Felix Soto, Leire Rodriguez eta Maribi Iartza, bi auzotarrekin batera, hirigintza proiektua egin nahi duten lekuan. (Argazkia: Agurtzane Altuna)
Amore eman bagenu, luxuzko etxebizitzak eginak egongo lirateke hemen Felix Soto, Uliako auzo elkarteaAstelehenean, hogei bat uliatar elkartu ziren udaletxean, komunikabideen aurrean egindako agerraldi baten bitartez. Orduan esandakoak berretsi dituzte auzo elkarteko lagunek; “arduragabekeria hutsa” litzateke lorategietan etxebizitza berriak egitea. Udalak badituela horretarako egokiagoak diren lursailak esan dute, eta euren erabakian atzera egiteko eskatu diote udal gobernuari. Bizilagunek Odon Elorzaren garaian parkean dauden ur-biltegiak desegitea saihestu zutela gogoratu du Felix Sotok, eta orain ere udal ordezkarien erabakiei aurre egingo dietela iragarri du auzo elkarteko ordezkariak: “Udal gobernuaren jarrera kezkagarria da, baina ez dugu amore emango. Denbora asko daramagu parkea defendatzen, eta hala jarraituko dugu”.
Haurren jolastoki
Sotok gogoan du bere seme-alabak, txikiak zirela, nola joaten ziren Uliako parkera arratsaldea pasatzera: “Lorategietan lasterka ibiltzen ziren; oso gogoko genuen hona etortzea”. Maribi Iartzak ere gogoan du auzoko haurrak nola ibiltzen ziren zapaburuak harrapatzen parkeko iturrian. Baina, parkeko ateak itxi zituzten, egun batetik bestera. “Aspaldian igandeetan soilik egoten zen zaindaria parkean; gainerako egunetan irekita egoten zen. Egun batean, ordea, ateak ixtea erabaki zuten, eta gune hau irekita egoteko borrokak gaur egun arte dirau”, dio Sotok.Hirigintza plana aldatu zutenean hasi ginen gure parkea defendatzen Maribi Iartza, Uliako auzo elkarteaUliako parkean etxebizitzak egiteko asmoa aspaldiko kontua da. 1995. urtean aldatu zuten hirigintza plana, lorategi izaera aldatu eta eraikitzeko aukera emateko. “Hirigintza plana aldatu zutenean hasi ginen auzo elkarteko kide batzuk elkartzen eta gure parkea defendatzen”, adierazi du Iartzak. Ziur dago, bizilagunak tematu ez balira, ez luketela parkea mantenduko. Uliatarrentzat auzoko gune berde bakarra dela esan du Sotok, eta ez litzatekeela bidezkoa ondare hori galtzea. Jaurlaritzak ingurumena eta parte hartzea sustatzeagatik emandako Elkarlan saria ere aipatu dute uliatarrek, “norabide onean” doazen seinale. Horregatik, ez dute ulertzen udal gobernua etxeak egitearekin “tematu” izana: “Hala dioten arren, argi gera dadila, hirigintza proiektu bat ez dela inondik inora bateragarria parkearekin, eta bertako jarduerekin“, esan du Leire Rodriguezek. “Donostiar guztiek erabiltzeko moduko parke ireki bat nahi dugu”, erantsi du. Aurreikusi dituzten etxebizitzak parkean sartu eta eskubi aldean dagoen lursailean egiteko asmoa dute. Ur biltegiak ez liratekeela ukituko esan du udalak. Auzo elkarteko kideen ustez, ordea, ur biltegien interesa eta balioa inguruak ematen dio: “Ur biltegien artean eta etxebizitzen artean pasabide bat besterik ez litzateke geratuko; parkea bere osotasunean ez errespetatzeak ez du zentzurik”, iritzi dute.
Donostiar guztiek erabiltzeko moduko parke ireki bat nahi dugu Leire Rodriguez, Uliako auzo elkarteaHirigintza asmoei aurre egitea egokitu zaie orain berriro uliatarrei, eta oraingoan ere ez daude amore emateko prest. Rodriguezek jakinarazi du sinadurak biltzen hasi direla, paperean zein Change.org plataformaren bidez. EAJ eta PSE-EEko ordezkariekin ere biltzeko konpromisoa hartu dute, “parkea bertatik bertara ezagutu dezaten”. Bigarren alkateorde Miren Azkaraterekin atzo egon ziren; Martin Ibabe zinegotzi jeltzalearen gaur izango dira. Azkarateren aldetik “erantzun ona” jaso dutela azaldu du Rodriguezek; ulertu du bizilagunen ezinegona, eta gaia gainerako alderdikideen artean eztabaidatzeko borondatea erakutsi du, baina ez die ezer agindu.
Egunero irekita
Uliako parkea oso ezaguna da bertakoen artean, baina gainerako donostiar askorentzat oraindik ezezaguna dela uste dute. Horregatik, azken bi urteetan bezala, Uliako Lore Baratzak proiektuaren bidez parkea biziberritzen eta ikusarazten saiatu dira. Auzo elkarteko kideen artean eta Uliako Lore Baratzak proiektua bideratzen duten 30 bat lagunen artean antolatzen dituzte txandak, parkea ahalik eta gehien irekita egon dadin. Egoera ikusirik, hemendik aurrera ahalegin berezia egingo dute parkea egunero irekita egon dadin.Apartamentuak Morlansen egitea proposatu du EH Bilduk
Uliako mintegietan aurreikusitako hirigintza proiektua zeresan ugari ematen ari da. Auzotarrek ez dute begi onez ikusten albistea, eta EH Bilduko zinegotzi Ricardo Burutaranek beste proposamen bat egin dio udal gobernuari: Gazteentzako apartamentuak Morlansen egitea. Burutaranen arabera, Loiolako Erriberan ere badago nahikoa toki apartamentuak egiteko, baina, horretarako, Eusko Jaurlaritzaren baimena behar du udalak; Morlanseko zatia, berriz, arazorik gabe moldatu daiteke: “Ingurumenari minik sortu gabe egin daitezke gazteentzako apartamentuak”. Burutaranen hitzetan, horrela, Uliako parkea zainduko litzateke, eta Morlanseko egoera hobetuko litzateke. “Merkeagoa izango da hirigintza proiektu hori Morlansen egitea, ingurua jada moldatua baitago: bidegorria, espaloiak, argiztapena…”. Morlanseko inguru horretan, egun, aparkaleku bat dago, eta, guztira, 2.100 eta 1.300 metro koadro ditu, bi zatitan banatuta. EH Bilduren asmoa da datorren udalbatzarrean aurkeztea proposamena, zuzenketa gisa. Onartuko balitz, proiektuak ez luke eraikuntza atzeratuko, Burutaranen arabera, lauzpabost hilabeteren bueltan onartu daitekeelako plan berezi bat. EH Bilduko zinegotzi Axier Jakaren ustez, “Uliako proiektua garatzen eta indartzen joan da, eta apartamentuek ez dute lekurik erreferentziako leku horretan; hsekulako galera litzateke”. Irabazi Donostia ere ez dator bat udal gobernuaren asmoarekin. Amaia Martin zinegotziaren ustez, “ez du zentzurik etxebizitza berri gehiago egiteak, hutsik dauden etxebizitzei irtenbide bat eman aurretik”.
