2.363 sinadura lortu dituzte astebetean.
Txorientzako habiak jartzen, atzo. (Argazkia: Uliako Lore Baratzak)
Uliako parkea babes zabala jasotzen ari da azken egunotan. Udal gobernuak bertako
lorategietan 77 etxebizitza egiteko izapideak abian jarri zituztela jakin zutenean piztu ziren alarma guztiak.
Auzo elkarteko kideak eta Lore Baratzak proiektuko kideak
lanean ari dira egoeraren berri eman eta herritarren babesa lortzeko. Hainbat udal ordezkari parkera joatea lortu dute, euren ezinegona adierazteko. Miren Azkarate, Martin Ibabe eta Enrique Ramosekin bildu dira, esaterako.
Sinadura bilketa bat ere jarri dute abian, eta astebetean
2.363 sinadura bildu dituzte
Change.org plataformaren bitartez. Hala nahi duenak, sinatzeko eskuorriak ere eska ditzake parkean bertan, edo auzo elkartearen egoitzan (Ategorrieta 67 ).
Uliatarrak gustura daude jasotzen ari diren babesarekin, eta babes hori argazki baten bidez irudikatu nahi dute datorren igandean. Hala,
igandean, otsailak 28, talde argazkia egingo dute Uliako parkean bertan, goizeko 10:30ean. Udal gobernuaren proiektuari “
EZ” esan nahi diote horrela, eta parte hartzeko deia egin dute.
Hegaztiak eta auzolana
Haurrak, txoriak ikusi nahian. (Argazkia: Uliako Lore Baratzak)
Gaia bolo-bolo dabilen bitartean, Uliako parkeko jarduerek ez dute etenik. Atzo, esaterako, bertako txorientzako
lau habi jarri zituzten.
SEO-Donostia ornitologia elkarteko kideek gidatu zuten goiza, eta arrakasta handia lortu zuten. Izan ere, eguraldia lagun, haur eta heldu, jende ugari bildu zen parkean.
Habiak jartzeaz gain, txoriak ikusi eta entzunez, Uliako mintegietan bizi diren hainbat txori ezagutzeko aukera izan zuten bertaratu zirenek. Ametzagainan egin zuten moduan, ornitologia elkarteko kideak
bilduma bat osatzen ari dira Ulian. Dagoeneko
31 txori mota jaso dituzte, eta atzo, beste bi berri sumatu zituzten: gerri-txoria eta tarina.
Datorren igandean, berriz, taldeko argazkiaren ondoren,
auzolana egingo dute. Oraingoan, udaberriko landaketak egiteko lurra prestatuko dute.
