Morlansko gune zaharraz ahaztu egin direla uste dute bizilagun askok. Espaloi estu eta hondatuak, argiztapen eskasa, zuloak errepidean... gutxieneko konponketa batzuk exijitu dituzte.
Auzoa zeharkatzen duen errepideak zuloak dituela, eta ia espaloirik ez dagoela salatu dute. (Argazkia: Nerea Lizarralde)
«Auzo oso polita da bizitzeko, baina gutaz ahaztu egin dira, gabezia asko ditugu. Utzita gauzkate». Martin Larunbe eta Hiart Gil de San Vicente bizilagunen hitzak dira.
Morlans zaharrean bizi dira, eta auzoan «berehalako neurriak» hartu behar direla uste dute.
«Argazki batzuk egin ditugu, udalera jo eta konponbide bat eskatzeko, baina udaletxean lan egin zuen ezagun batek esan digu kasu gehiago egingo digutela
Diario Vasco-ra gutun bat idazten badugu, eta are gehiago hauteskunde garaia bada. Oso tristea da horretaz konturatzea», jarraitu du Gil de San Vicentek.
«Ofizialki» udal agintariekin ez dira inoiz bildu, baina udal agintariei aspalditik jakinarazi dizkiete euren egunerokoan sufritzen dituzten arazoak. Morlansko Mari-k askotan hitz egin izan du agintean izan diren alkateekin, «aspalditik dakite hemen arazo bat dagoela, baina ez dute neurririk hartu. Aurrekonturik ez dagoela diote».
Luis Garzonek berrogeita hamar urte eman ditu auzoan. «Noizean behin» konponketaren bat edo beste egiten dutela esan du, baina argi utzi nahi izan du: «Urte askoan ez du ezer egin. Hau geldirik egon da».
Auzoa zeharkatzen duen errepidea eta espaloiak dira kexa nagusia: «Begira nola dagoen, zuloz beteta dago. Oso estua da, eta bi norabidekoa. Oso arriskutsua da», esan du Larunbek.
Aieteko parkera sarrera, eta ingurua ere utzita daudela uste dute auzotar askok. (Argazkia: Nerea Lizarralde)
Espaloien egoera ere «tamalgarria» dela azaldu du Gil de San Vicentek: «Errepidearen zati batzuetan, ez dago oinezkoentzako biderik, eta dauden bakarrak oso hondatuta daude. Nire alaba eta biok eskolara oinez goazenean kontuz ibili behar dugu, eta askotan auto gidariak haserretu egiten dira azkarregi doazela esaten badiet».
Auzoan adineko jende asko bizi da, eta askok etxetik ateratzeko DYAren laguntza eskatu behar izaten dutela esan du Gil de San Vicentek. Pakita Nikolasa bizilagunak bizitza osoa eman du auzoan, eta berak ere irisgarritasun arazoak salatu ditu.
Argiaren kable elektrikoak agerian daudela, eta oro har auzoa gaizki argiztatuta dagoela uste du Gil de San Vicentek. Eta garbiketa gehiago eskatu dute: «Hostoak ez dituzte kentzen, eta pilatzen joaten dira, estoldak buxatu arte». Ur hodiak ere zaharrak direla esan dute, eta ura urtean gutxienez hiru aldiz mozten dietela.
Konponketak eta mantentze lanak eskatu dituzte: «Euria egiten duenean, errekatxo txikiak sortzen dira ezohiko lekuetan, ura bideratzeko azpiegiturak hondatuta daudelako». Azken elurtean kale guztia izoztu egin zela, eta auzoan harrapatuta geratu zirela ekarri dute gogora: «Ezin ginen ez oinez, ez autoz ibili. Ez zen inor etorri. Hiru egun eman nituen auzotik jaitsi gabe», azaldu du Gil de San Vicentek.
Aieteko parkerako sarrera eta ingurua ere utzita daude, haien ustez: «Horma puskatzen ari da, eta harriak erortzen dira. Gainera, urtean soilik bi aldiz jaisten da goiko lorezaina, eta zuhaitzak erori eta lur jauziak gertatzen dira. Gehiegi hazten ari diren zuhaixkak ere ez dituzte mozten». Morlans zaharretik Aietera joateko bideak ere konpondu behar direla nabarmendu dute.
Morlansko gune berria eraiki zutenetik segurtasun handiagoa sentitzen dute, eta bizilagun berriek Morlansi bizia eman diotela uste dute. Halere, ez dute gune zaharra eta berria lotzea lortu.
Garai batean Morlans zaharrean ziren bi tabernak, denda eta arropa garbitegia desagertu egin dira, eta jada ez dago saltokirik: «Egunero banatzaile bat pasatzen da auzotik, ogia, egunkaria eta esnea saltzera, lehen herri txikietan egiten zen bezala».
Pena ematen diela diote: «Konponketa batzuk egingo balituzte, erraz mantenduko lukete inguru hau». Historia ederra duen auzoa dela adierazi dute, baina utzita dagoela. «Morlansek duen onena da bizilagunon artean dugun harreman ona. Ikaragarria da. Erdialdean gaude, baina herri giroa dago. Gure kexa da ez dutela auzoa konpontzen», esan du Larunbek.
