Utzitako lursail batean abiatu zuten auzo baratzea; gaur goizean kendu dute udaleko garbiketa zerbitzuek. (Argazkia: Urgullpeko Gazteak)
Gaur goizean, udalaren garbiketa zerbitzuek eta udaltzainek Trinitate plazako auzo baratzea desegin dute. Parte Zaharreko Urgullpeko Gazteak gazte asanbladak salatu dute gertatutakoa, sare sozialen bidez: “Denon artean eraiki dugun baratzea da, autogestioaren bidean, baina badirudi Donostia kultur hiriburu den honetan baratzek ere ez dutela tokirik, molestatu egiten dutela”.
Joan den asteburuan, EzDuguNon dinamikaren barruan auzo baratzea bat abiatu zuten Trinitate plazan, utzita zegoen lursail batean, eta lau egunez, auzolanean aritu dira. Erabiltzen ez den lurra berreskuratu eta auzolanaren bidez auzotarrentzako gune bat sortzea zuten helburu. Espazio autogestionatuak aldarrikatzeaz gain, nekazaritza kultura ere sustatu nahi zuten, auzo giroa bultzatu.
Asanbladan bilduta zeuden pertsona batzuk identifikatu dituzte
Goizean auzo baratzea desegin dutela eta, arratsalderako asanbladara deitu dute 17:00etan. Proiektuarekin aurrera jarraitzeko asmoa dute, eta aurrera begira zer egin erabakitzeko bildu dira. Trinitate plazan zeudela, udaltzainak agertu direla adierazi dute Twitter bidez, eta bilera hasi denean, Ertzaintza agertu dela, eta asanbladan bilduta zeuden pertsona batzuk identifikatu dituela salatu dute.
