Ikasbide Ikastolaren 50. urteurrena prestatzen lagundu nahi duzu?
Ikasle, irakasle, langile eta familien oroitzapenak jaso nahi dituzte.
Ikasbide Ikastolaren 1989ko irudi bat. (Argazkia: Ikasbide Ikastola)
1967. urteko urtarrilean sortu zuten
Ikasbide Ikastolaren ibilbidea mugitua izan da oso, eskolak emateko hainbat kokaleku izan baititu. Hasieran, Baleazaleen kaleko pisu batean egon zen; ondoren, Isabel II.aren kaleko lokaletan eman zituen eskolak; 1979. urtean, Lehen Hezkuntzakoak Txuri Urdineko lokaletara pasa ziren; 1984 ikasturtean, taldeak gehitzen joan zirenez gero, gela aurrefabrikatuetan ere ematen ziren klaseak. Udalak Amezketa plazako eraikina utzi zienean Haur Hezkuntzakoak bertara joan ziren. Isabel II.aren lokalak hutsik geratu zirela baliatuta, hainbat gurasok Ikasbide Kultur Elkartea sortu zuten, auzoan ere euskara eta euskal kultura sustatzeko asmoz. Euren Lehen Hezkuntzako eraikinen baldintzak eta jolastokien beharrak ikusita, hutsik zegoen Zorroaga gaineko Gurutze Gorriaren eraikina hartzea erabaki zuten. Eta azkenik, 2011n, urteetan zehar aldarrikatutako behin betiko egoitza estreinatu genuen, Loiolako Erriberan. Hasiera batean, Ikasbidek, ikastolen federazioen babespean, dagozkion guraso eta irakasleen ordezkarien batzordeekin ikastola pribatu gisa funtzionatu zuen. Arantzazuko Ama, Orixe, Zurriola eta Jakintza ikastolekin batera Barandiaren Lizeoa sortu zuten, beraien proiektuari Bigarren Hezkuntzan jarraipena emateko. 1994. urtean, publikoa bihurtzeko erabakia hartu zuen guraso asanbladak, Haur Hezkuntza eta Lehen Hezkuntzako Ikasbide Ikastola izena hartuz. Egun, 2 eta 12 urte bitarteko haurrak hartzen ditu ikastolak.
