Lehen zerbitzari lasterketa egingo dute Amarako jaietan

Nerea Lizarralde

2016/07/18

Antzinako uniformarekin parte harztera animatu dituzte.

Berritasun bat ekarriko du Amarako jaietako egitarauak. Aurten lehen aldiz egingo dute Zerbitzari lasterketa! Uztailaren 30ean izango da, 11:00etan, Easo plazan. Lasterketa herrikoia izango da, eta nahi duenak parte hartu ahal izango du. Zerbitzari izan ala ez, izena eman daiteke. Erakutsi behar dena honakoa da: gai al zara Easo plazari korrika bi buelta emateko, erretiluan daramazuna bota gabe? Garagardo botila bat eta bi kaña eraman beharko dituzte parte hartzaileek. Edarietako bat eroriz gero, irteerara itzuli beharko du. Erretiluaren gainean garagardo guztiak dituela helmugara iristen denak irabaziko du lasterketa. Auzoko tabernariei dei egin diete proban parte hartzera. Parte hartzaile bakoitzak bere erretilua eraman beharko du, eta antzinako uniforme klasikoa jantzi beharko du, ahal bada –galtza beltzak eta jaka zuria–. Irabazleak zer irabaziko du? Bi lagunentzako afaria Petritegi sagardotegian. Uniformerik onena ere sarituko dute.