Ariketa fisikorako tartea izango da Amarako jaietan

Ostegunetik igandera izango dira festak, eta Easo plaza izango da erdigunea.

Estitxu Zabala

2016/07/27

Iazko zumba eta aerobic saioak, Easo plazan. Amara

Iazko zumba eta aerobic saioak, Easo plazan. (Argazkia: Estitxu Zabala)

Amarako jaiak ostegunetik igandera ospatuko dituzte, irakurri al duzu egitaraua?. Dirudienez, jaietan osasuntsu egoteko apustua egin dute, eta hiru egunetan ariketa fisikoa egiteko aukera egongo da. Jaiak hasi eta berehala, zumba eta aerobic saioak egingo dituzte; larunbatean, Zerbitzarien lasterketa egingo dute; eta, igandean, krosa. Zerbitzarien lasterketa uztailaren 30ean izango da, 11:00etan, Easo plazan. Nahi duenak parte hartu ahal izango du; kontua da erretiluan garagardo botila bat eta bi kaña eramatea.

Igandean ere korrika egingo dute

Badirudi jaietako krosa ez zebilela indartsu, eta aurten ibilbidea aldatzea erabaki dute. Beraz, larunbatean ez ezik, igandean ere korrika saioa egiteko aukera egongo da Amaran, oraingoan, edaririk garraiatu gabe. Ibilbide laua egingo dute partaideek, Easotik Errondo pasealekura, Morlans arte, eta hortik Autonomiatik itzuliko dira Easo plazara, hiru aldiz. Lasterketa igandean izango da, 11:00etan.