Dotore amaitu dute Aste Nagusia piratek

Umorea eta kritika nagusi berriro ere Irrikitaldian.

Agurtzane Altuna

2016/08/21

Abordatzearekin batera, Irrikitaldia da agian Pirata gehien biltzen dituen ekitaldia; azken topaketa, Aste Nagusi Piratari agur esateko. Izenak berak hala iradokitzen duenez irri, burla eta kritika egiteko eguna da gaurkoa. Zapiak eta begiko partxea albo batera utzi, eta dotore dotore jantzi dira gainera gaur piratak. Belle Epoque garaira egin dute jauzi. Glamourra, dirua, elegantzia nagusi ziren garaira. Hiriko burges dirudun eta agintariez gain, luxuko gonbidatuak ere izan dituzte Irrikitaldian: Espainiako errege-erreginak, Felipe eta Letizia izan dira desfilearen buru. Atzetik, udal ordezkariak, Eneko Goia alkatea eta Ernesto Gasco alkateordea. Donostialdeko metroko lehen bagoian zihoazen hauek, alai agur eginez kale bazterretako ikusleei. Metroa, AHTa, zezenketak, herri galdeketak, kultur hiriburutza eta turismo eredua izan dituzte hizpide, besteak beste, Santa Maria elizan egin duten antzerkian. Ondoren, kalejiran jarraitu dute Parte Zaharreko kaleetan barrena. Bideo eta argazki bilduma honetan bildu IRUTXULOKO HITZAk Irrikitaldiaren laburpentxo bat.