Pilota partidak jokatu dituzte gaur, Amarako frontoiaren alde

Eguraldia ere aldeko izan dute auzotarrek Arrokako frontoia babesteko jaialdian.

Miren Azkarate

2016/11/20

Eskuzko pilota partidak jokatu dituzte gaur goizean Amarako Arroka frontoian. Amara Bai Auzo Elkarteak, auzoko frontoia botatzearen aurka aurrera daraman ekitaldien artean txertatzen den jarduera bat izan da gaurkoa. Festa giroan antolatu duten eguna izan da. Goizeko 11:00etan ziren hastekoak pilota partidak, baina ordu horretan Donostia Berri elkartetik aterata kalejira bat egin dute frontoian amaituaz. Trikitixa eta panderoaz lagunduta, hamarnaka auzotar animatu dira kalejiran parte hartzera. Horien artean pilotariak. Lehen partida 11:30ak aldera hasi da. Emakumezkoen buruz burukoa izan da. Patri Espinar eta Eneritz Arrieta aritu dira nor baino nor, ikusten ari zen publikoak animatuta. Bukaeran markagailuak Espinarren aldeko emaitza utzi du, 18-11. Hala ere horrelako egun batean emitzak ez duela axola esan dute protagonistak. Espinarren hitzetan, “deitu zidatenean partidu hau jokatzeko ez nuen inongo dudarik izan etortzeko. Pilotari bezala ezin dut ulertu eta ezin dut bat egin frontoi bat botatzearen proiektu eta ideiarekin”. Pozik azaldu da parte hartzera gonbidatu dutelako eta bere esanetan, espero du azkenean auzotarren borrokarekin lortuko dutela frontoia ez iristea.

Gizonezkoen partidua Amarako frontoian. (Argazkia: Miren Azkarate)

Ondoren gizonezkoen binakako partida jokatu dute: Koka eta Chiapuso, Urmeneta eta O. de Zarateren aurka. Amaieran, markagailua 22-19. Hauek ere pozik azaldu dira gonbidatuak izatearekin eta harro parte hartu izan dutelako horrelako aldarrikapen bat duen jaialdi batetan. Frontoia ez botatzeko eskaera argia egin dute. Hau guztia gertatzen zen bitartean, Amara Bai Auzo Elkarteko kideak, txorizo eta tortila pintxoak prestatu dituzte bertaratu den auzotar eta ez auzotar guztientzako. Musika ere etengabe entzun zitekeen, aldarrikapena jai giroan ospatuz. Amaieran, bertaratu diren guztiak banan banan, binaka, familian edo eta lagun artean, “Gasco- Goia, ez bota frontoia” idatzita zeraman orri batekin eskuan, argazki bat atera dute. Ondoren, sare sozialetan eskegi dituzte antolatzaileek. Adin guztietako jendea bertaratu da ekimenera. Horien artean haur asko. Gaur egun batez ere beraien jolasteko tokia delako Amarako Arroka frontoia. Nahiz eta jai giroan ospatu duten gaurko eguna, auzotarrak haserre ageri dira Donostiako Udalak hartu duen erabaki berri honen aurrean. Datozen egunetan mobilizazioekin jarraituko dutela adierazi dute. Bihar bertan, Amarako Zahar Etxean mahai inguru bat antolatu dute arratsaldeko 19:00tan. Bertara, Donostiako Udaleko alderdi politiko guztiak daude gonbidatuta. Oraingoz, asistentzia baieztatu dutenak Irabazi Donostia eta EH Bildu izan dira. PSE-EE-k ez dela azalduko esan die, eta EAJ eta PPren erantzunaren zain daude. Hona hemen egunak utzi duena, iruditan: