Parte-hartzea handia izan da; auzotarren %49,8ek eman dute botoa.
Boto kontaketa egin dute udaletxean. (Argazkia: I. Esnaola)
Amarako bizilagunek posta bidez emandako iritziaren zenbaketa egin dute gaur eguerdian, udaletxeko udalbatza aretoan. Arroka kaleko aferaren bueltan, plazaren alde egin dute bizilagun gehienek (734 boto). Hain zuen, Arrokako frontoia mantendu edo bertan plaza bat egiteko proposamenaren artean aukeratu behar zuten auzotarrek. Horretarako, posta bidez iritzia emateko aukera izan dute.
Botoa eman zezaketen bizilagunak 2.558 ziren, eta partaidetza %49,8 izan da. Kontaketaren ostean parte-hartze prozesuak aurrera jarraituko duela berretsi dute Eneko Goia alkateak eta Duñike Agirrezabalaga Partaidetza zinegotziak.
Arrokako partaidetza prozesuko behin-behineko emaitzak:
- Frontoiaren alde: 527.
- Plazaren alde: 734.
- Zuriak: 3.
- Baliogabeak: 5.
Arrokako galdeketaren inguruko balorazio ona egin dute udalbatzara hurbildu direnek.
Ordezkari politikoen, Partaidetza sailaren eta Amara Bai auzo elkartearen iritzia jaso du IRUTXULOKO HITZAk.
Ernesto Gasco (PSE-EE): “Arrakastatsua izan da parte-hartzea, eta bereziki arrakastatsua da aukera zentzudunena atera izana. Apustu integratzaileena eta Amara auzoari kalitatea ematen diona da”.
Mari Paz Casanova (Amara Bai): 527 herritarrek gure proiektuaren alde egin dute, eta hori oso ona da. Auzoarentzako onena denaren alde lanean jarraituko dugu.
Duñike Agirrezabalaga (Partaidetza zinegotzia): “Ez da prozedura erraza izan, baina balorazioa oso positiboa da. Plazaren proposamenak irabazi ondoren, hemendik aurrera beste prozedura bat egingo dugu auzoan plaza horren diseinua denon artean adosteko”.
Eneko Goia (Donostiako alkatea): “Zoriontzeko modukoa da parte hartze kopurua. Agerian utzi du, galdeketa erreminta egokia dela ikuspegi ezberdinen arteko eztabaida horiek naturaltasunez bideratzeko”.
Loïc Alejandro (Irabazi Donostia): “Arrokako galdeketak erakutsi du herritarrek interesa dutela beraien iritzia emateko gai jakinen inguruan”.
Ostiraleko astekarian, Arrokako prozesuaren inguruko informazio zabalagoa irakurri ahal izango da.
