"Garaipen handia izan da gaurkoa"

Gipuzkoa Zutikek deituta, erraustegira iritsi eta bertan sartzea lortu dute, makro kartzela eta errauste plantaren aurkako jarrera adierazteko xedez.

Lide Ferreira

2017/05/27

erraustegiaren-eta-makro-kartzelaren-aurkako-martxa-nazionala-gipuzkoa-zutik2

Erraustegiaren eremuan sartu diren unea. (Argazkia: Lide Ferreira)

Gipuzkoa Zutik mugimenduak martxa nazionala deitu du gaurko, Zubietako makro kartzela eta erraustegiaren aurka. Bada, 16:00etan, martxa egin nahi zuten ehunka herritar elkartu dira Herriko plazan, eta hiru zutabetan banatu dira. Buzoak, maskarillak eta pelukak jantzita, bakoitzak bide bat hartu du eta denak iritsi dira makro kartzela eta errauste planta dauden tokira. Helburua horixe zen, eta lortu dute. Ertzaintza makro kartzelaren eremuan zegoen arren, ez da istilu berezirik gertatu. Herritarrak erraustegiaren eremuan sartu dira, eta ekintza bat egin dute bertan –besteak beste, sinbolikoki, nendo dango hazi bolak erein dituzte planta eraikitzeko zoruan–, eta Zubietako proiektuaren aurkako oihuak entzun dira eta aldarrikapenak egin dituzte: tartean, “ustela lurpera, bizitza da handiena; PNV kapitala, aliantza kriminala; gurea da garaipena”. “Giza eskubideak borrokatu eta irabazten dira” Martxa nazionalari amaiera eman eta lorpena ospatzeko asmoz, Zubietara bueltatu dira herritarrak eta herriko plazan ondorengoa esan dute: “Helburua zen erraustegira iristea eta lortu dugu. Gainera, 300 hazi zabaldu ditugu bertan; hala, zuhaitza eta bizia jaioko dira lur horietan, erraustegiaren kontra. Bere txikitasunetik garaipen handia izan da gaurkoa. Giza eskubideak ez dira bozkatzen, borrokatu eta irabazten dira. Erraustegiarekin bukatu behar dugu, horregatik, jarraituko dugu borrokan”.