Lauroba taldea. (Argazkia: Ane Lauroba)
Hamalau urteko ibilbidea egin ondoren, taldea desegingo dutela jakinarazi du Donostiako
Lauroba taldeak. Beraz, bere jardunari bukaera ematea erabaki du. Agurtu aurretik, hilabete honetan bertan abesti bat argitaratuko dute. Gainera, martxoaren 3an Donostiako Doka antzokian azken kontzertua emango dute. Hantxe esango diete agur zaleei.
Laurobaren azken emanaldi honetarako sarrerak jada salgai daude.
Sare sozialen bidez zabaldu duten oharra:
LAUROBA AGURRA
Beti omen dago une bat agur esateko, bideei amaiera emateko… eta guri ere iritsi zaigu momentu hori.
Gustura jarraituko genukeen aurrera; bagenuen gogo, ideia eta kemenik gure musika egiten jarraitzeko. Baina bide honetan aurrera, zalantzan jarri behar izan dugu aurrera jarraitzeak merezi ote zuen.
Azkenaldian oso zaila izan da gure musika modu duin batean plazaratzen jarraitzea, eta 14 urteko ibilbidearen ostean, konturatu gara gure jardunari amaiera jartzea dela onena.
Esker hitzak besterik ez ditugu urte hauetan guztietan alboan izan zaituztegun horientzat. Gure abestiekin zerbait sentiarazi dizuegula sinestarazi diguzuenoi, mila esker bihotzez. Ederra izan da zuek, oholtzetako bidelagun izan zareten horiek, ezagutu izana.
Hala ere, agur honetan izango dira azken bi mugarri.
Otsailean grabatu eta kaleratuko dugun azken kantua izango da agur horren lehen urratsa.
Bigarrena, martxoaren 3an Donostiako DOKA Antzokian eskainiko dugun azken kontzertua.
Esan beharrik ez da kontzertu hunkigarria eta berezia izango dela guretzat, eta gustura izango zintuzketegula gurekin. Hemen eta han arteko lekuren batean ikusiko dugu elkar.
