Letren artean galtzeko grina
Asko dira Donostiako Udal Liburutegietako erabiltzaileak, baita liburu dendetako erosleak ere; adin ertainekoak dira irakurle ohikoenak, eta irakurketa taldeetan ere parte hartzen dute.
Udal liburutegietako erabiltzaileek ohitura handia dute liburuak, aldizkariak eta egunkariak irakurtzeko, liburutegietan bertan. (Argazkia: Estitxu Zabala)
‘Patria’, irakurriena
Donostian 2017an liburu irakurriena Patria izan dela esan daiteke. Izan ere, Fernando Aranburu idazle donostiarraren lana salduena izan da liburu dendetan, eta bigarren mailegatuena liburutegietan. Donostian hamar liburu denda inguru daude, liburuen salmentan berezituak daudenak, auzoetako denda txikiak kontuan izan gabe. Adolfo Lopezek Erdialdeko Zubieta liburu dendan lan egiten du, eta ongi ezagutzen du irakurleen errealitatea: «Patria liburuetan liburua izan da. Izugarria da zenbat erosi eta oparitzen den oraindik ere». Atzetik daude Eva Garcia Saenz de Urturiren El silencio de la ciudad blanca eta Dolores Redondoren Baztango trilogiako liburuak: «Hiru euskal idazlek salmenten lehen postuak guztiz bete dituzte». Gaztelaniazko salduenen artean egon dira, era berean: Almudena Grandesen Los pacientes del doctor Garcia, Dan Brownen Origen, Javier Sierraren El Fuego invisible, eta Cristina Lopez Barrioren Niebla en Tanger. Euskarazko literaturan, ez dute bat egiten liburu salduenek eta gehien mailegatutakoek. Izan ere, salduena izan da Uxue Alberdiren Jenisjoplin. Nagore Vargasen istorioa kontatzen du eleberriak, eta, bien bitartean, Euskal Herriak azken urteetan bizi izandako aldaketa politikoak azaltzen ditu. Bere atzetik geratu dira Alberto Ladronen Jainkoen zigorra, Eider Rodriguezen Bihotz handiegia, eta Elurra ikusi dut (Koldo Izagirrek Xabier Leteren poesiekin egindako bilduma). Orain, esaterako, aipatutakoez gain, Anjel Lertxundiren Horma asko saltzen ari dira. Liburutegietan gehien mailegatutakoa, berriz, Alberto Ladronen Arotzaren eskuak izan da, eta bere atzetik hauek: Elkarrekin esnatzeko ordua, Nola heldu naiz ni honaino eta 33 ezkil. Donostiako liburu erosleei dagokienez, Lopezen esanetan, tokiko idazleak asko bilatzen dituzte, bertako erreferentziak izateak asko eragiten baitu:?«Gustatuko litzaiguke gazteek gehiago erostea, baina argi dago Donostiako batez besteko eroslea dela adin ertainekoa, 40 urtetik gorakoa, nolabaiteko erosteko ahalmena duena, eta ikasketak dituena». Zer irakurri aukeratzerakoan, denetik dagoela dio Lopezek: «Liburutegi handietara joaten direnek, normalean, begiratzen dute zer den salduena eta horren arabera egiten dituzte erosketak. Denda txikiagoetan, dendariak saiatzen gara erosleak bideratzen, gustatzen zaienaren eta irakurri nahi duten estiloaren arabera». Bakoitzarentzat erosteaz gain, liburu asko oparitzen dira orokorrean, bereziki, haurrentzako direnak. Liburutegietan, esaterako, hamabi urtetik gorakoentzako liburuen artean, Larunbatean Bukowskin izan da mailegatuena. Liburu elektronikoek orokorrean min gutxi egin diete liburu dendei, Lopezek dioenez. «Hasieran indartsu sartu ziren liburu elektronikoak, baina oraindik jendeak nahiago du liburu fisikoa». Literatura euren bizitzen parte egitera iritsi dira donostiar batzuk (Amaia Garciaren eta Beñat Sarasolaren bizipenak) Auzoko irakurle sutsuak (Loiolako lau emakume irakurzaleren inguruko erreportajea)
