Añorgan festa ederra egingo dute asteburuan, elegante jantzita eta ekitaldiz beteriko egitarau zabal batekin. Hain zuzen, auzotarrek Gazte Eguna antolatu dute larunbaterako, jaia egunsentira arte luzatzeko asmoz.
Festa goizetik abiatuko dute, gaztetxe parean 11:00etan egingo duten hormairudiaren margoketarekin eta 12:30etako proiekzioa eta brindisarekin. Auzotarrak elkarrekin bazkaltzeko bilduko dira ondoren, eta bazkalostean bingo musikatuaz eta Peputzen kontzertuaz gozatzeko aukera izango dute.
Arratsaldean, Añorgako gazteak Antigua eta Parte Zaharrekoekin lehiatuko dira,
duela zenbait aste egindako bideo xelebre baten bidez ‘desapiyua’ luzatu baitzieten. Gaualdera, berriz, bokatak afaldu ostean Herenegun eta Gabezin taldeen kontzertuekin egingo dute dantza. Parranda DJ Molongiren emanaldiarekin luzatuko dute hurrengo goizera arte, 07:00etatik aurrera egingo dituzten txokolate jana eta gaupaseroen argazkiarekin festa biribiltzeko asmoz.
