Europan lehiatzeko postua ziurta dezake Bera Berak
Ligako sailkapenean bigarren postutik bi puntura dago; bere ibilbideko lan onena egiteko aukera dauka. Bera Bera Eskubaloiak oso garaipen garrantzitsua eskuratu zuen aurreko larunbatean, Eldari irabazita. Izan ere, ABF Ligako bigarren sailkatua da Elda eta garaipenari esker, Donostiako taldea bigarren postu horretatik bi puntura dago momentu honetan. Hala, bere historian Ligan lortutako posturik onena lor dezake Bera Berak.
Ez da kasualitatea donostiarrak sailkapenaren goikaldean egotea; Liga hasi zenetik, sekulako emaitzak lortu baititu taldeak. Hala ere, oraindik bost jardunaldi falta dira Liga bukatzeko eta oraindik ezer ere ez dago erabakita.
Larunbatean bertan, sekulako partida osatu zuen Reyes Karrerek zuzentzen duen taldeak eta 27-23ko markagailuarekin bukatu zen lehia. Gainera, lau minutuz Bera Berak bi jokalari gutxiagorekin jokatu behar izan zuen eta, hala ere, orduantxe erabaki zen partida, etxekoen alde. Izan ere, Azenaide eta Punko pibotak kantxatik kanpo egonda ere, taldeak oso ongi defendatu zuen eta aldi berean, ez zion golak sartzeari utzi.
Bestetik, Sagunto da laugarren sailkatua, Bera Bera baino hiru puntu gutxiagorekin. Sailkapeneko izarra, ordea, Itxako ahalguztiduna da eta Lizarrako taldea izango da, hain zuzen ere, Bidebietako hurrengo bisitaria.
Matematikoki ziurtatu nahi
Indarrak Itxakorekin neurtu aurretik, Elcheri irabazi beharko dio Bera Berak datorren asteburuan. Elche ez dago bere momenturik onenean, baina Karrerek ez dio bere taldeari erlaxatzen utziko. Izan ere, Elcheri irabaziz gero, matematikoki Europan lehiatzeko postua ziurtatuko lukete.
