Ziklomotoreen azterketa teknikoa egiteko zerbitzua, Igaran
Zerbitzugune ibiltaria uztailaren 28a arte erabilgarri izango da aurrez hitzordua eginda.
Ziklomotorren eta motozikleten azterketa teknikoa egiteko ibilgailu ibiltaria jarri dute Igaran. Udalak Igara bidean duen auto ofizialen kotxetegian dagoen furgonetak, ziklomotore eta zilindro edukiera txikiko (250 arte) motozikleten azterketa egiteko beharrezko baliabide tekniko eta mekanikoak ditu. TUV Rheinlandek kudeatutako zerbitzua, uztailaren 28a arte erabilgarri izango da.
Hirian matrikulatutako 9.000 bat ziklomotore daudela jotzen dute arduradunek.Ibilgailu hauei hiru urte betetzean, froga teknikoa egin behar zaio ezinbestean, eta ondore, bi urtean behin. TUV Rheinlandek ibilgailuen azterketa teknikoa egiteko bi gune iraunkor ditu, bata Irunen eta bestea Usurbilen.Uda hurbiltzen ari dela ikusta, zerbitzua ziklomotorrei zabaldu diete. «Zilindro edukiera gutxiko ibilgailuek mugatuta dute errepideetan ibiltzea, horregatik, zerbitzu ibiltaria abian jarri dugu», argitu zuen TUV Rheinlandeko Ignacio Artolak.
Arazo teknikoek eragindako istripu arriskua murriztu eta segurtasun baldintzak mantentzea helburu dute ikuskapenek. Era berean, kutsadura eta zarata gutxiagotzea ere xede dute. Horretarako, zerbitzugune ibiltariak, azterketa eta diagnosirako teknologia aurreratuenak ditu. Azterketa bi ikuskatzailek egingo dute. Batek administrazio kontuak egiten ditu, hau da, dokumentazioa jaso, ordainketa egin, informazioa erregistratu eta azterketaren emaitzak eman. Besteak aldiz, ibilgailua erabili eta hainbat froga egiten ditu. Horien bidez, gainontzeko ibilgailuen kasuan bezala, argiteria, gurpilak, motorra, gidagailua, galgak eta beste hainbat alor frogatzen dira Arazo teknikoekin batera, abiadura areagotzeko egindako moldaketak ere topatzen dituzte mekanikoek. Artolaren hitzetan, gero eta gutxiago dira, «ibilgailuen %5 edo %10».
150 bat hitzordu dituzte jada, eta aurreko urteetan izan dutena baino jende gehiago hurbiltzea espero dute. «%10a edo etorri da. Garrantzitsua da autoen kasuan bezala, azterketa egitea, argiteria, galga edo gurpilen ondorioz istripuak izatea saihesteko».
8:30etik 14:30era
Zerbitzua atzotik erabilgarri dago. Aste honetan bihar egingo dituzte froga teknikoak, eta datorren astean, asteartetik ostegunera bitartean. Ordutik aurrera, eskaeraren arabera zehaztuko dute egun kopura. Frogak 8:30etik 14:30era bitartean egingo dituzte, baina ezinbestekoa da aurrez hitzordua egitea. Horretarako, Irungo zerbitzuguneko 943 626300 telefono zenbakira deitu behar da. Frogak, 24,80 euroko kostua du.
Kokalekua probisionala da, Artolak aurreratu zuenez, datorren urtean, Eusko Jaurlaritzak utzitako Morlanseko eraikin batean izango dira. Horrela, mugikorra izan arren, urte osoan zerbitzua eman ahal izatea espero dute.
Hainbat motoziklista bertaratu ziren atzo goizean Igarara, beraien ibilgailuak aztertzera (Argazkia: Maitane Aldanondo)
