Oreka mantentzeko prest datoz

Estitxu Zabala

2012/01/06

Ekilibristak izeneko seikoteak kontzertua eskainiko du bihar Dokan, 21:00etan hasita

Ekilibristak taldeko hiru kide donostiarrak dira.

Ekilibristak musika taldeak 10 urte inguru daramatza jada musika sortzen. Gaur egun, sei kidek osatzen dute taldea: Sergio Garcia (baxua), Asier Osinalde (ahotsa), Mikel Osinalde (teklatua, tronpeta, gitarra eta harmonika), Iñigo Larrañaga (gitarra), Iñaki Manterola (bateria) eta Haritz Laka (gitarra). Lehenengo hiruak, hau da, Sergio, Asier eta Mikel donostiarrak dira, Amarakoak zehazki; Iñigo, berriz, Trintxerpekoa da, eta beste biak, Haritz eta Iñaki, Hondarribikoak. Musika lasaiagoarekin hasi ziren arren, egun bereziki rock doinuak jotzen dituzte. Ekilibristak taldeak kontzertua eskainiko du bihar, 21:00etan, Dokan, eta beraien berri zehatzagoa izateko, Haritz Laka gitarristarekin hitz egin du Irutxuloko Hitzak. «2000. urtean, taldekide batzuk Bilbon elkar ezagutu zuten, bertan ikasten ari zirela. Musika gogoko zuten eta elkarrekin etxe batean geratzen hasi ziren, abestiak jotzeko». Hala, hortik musika talde bat sortzearen ideia otu zitzaiela dio Lakak. Aurrerago, Egian lokal bat lortu zuten, eta horrek entseatzeko lekua ziurtatu zien, eta bide batez, gauza berriak probatzeko aukera. Seikoteak 2003an eskaini zuen bere lehen kontzertua, Bilborocken. Ordutik, hainbat kontzertu eman ditu, horietako asko Donostian: Guardetxean, Atabal tabernan, Leize Gorrian, MAD tabernan… «Beti izan dugu gure abestiak sortzeko gogoa, eta hori egin izan dugu. Beste talde batzuen abestien bertsioak ere egin izan ditugu, Hertzainak, Ruper Ordorika, Michael Jackson…, baina jotzen dugunaren %95 guk sortutakoa da». Gainera, batik bat euskaraz abesten dute, baina badute gaztelerazko eta alemanierazko abestiren bat. 2012 urteari gogor ekiteko gogoa du taldeak, beti ere oreka galdu gabe; eta kantu sorta berri bat eskainiko du Dokan. «Kontzertuan ahalik eta jende gehien biltzea nahi dugu, eta era guztietako propaganda egiten ari gara, kartelen bidez, Interneteko sare sozialen bidez, lagunen bidez… ea jendea biltzea lortzen dugun!». Ekilibristak, kontzertua

Noiz. Bihar, urtarrilak 7, larunbata, 21:00etan.
Non. Dokan. Errege Zain kalea 20, Antigua.