Erakundeei dirurik eskatu gabe, autofinantzatzeko gai izan da Kursaal
Marka guztiak gainditu zituen Kursaal elkarguneak 2010ean, eta iaz ere bide beretik jarraitu zuen. Gaur eguerdian aurkeztu dute iazko jardunaren balantzea. Biltzar kopurua 30etik 23ra jaitsi bada ere, tamaina handiagokoak izan direla nabarmendu du Iker Goikoetxeak, Kursaaleko zuzendari-gerenteak. Hala, biltzar kopuruan izan den beherakadak ez dio fakturazioari eragin. Guztira 4, 2 milioi bildu dituzte, aurreikusitakoa baino %7,9 gehiago, eta iaz lortutakoa baino %4,4 gutxiago.
Erakundeei dirurik ez diotela eskatu behar izan azaldu du Goikoetxeak, autofinantzatzeko gai izan direlako. Hori gutxi balitz, 825.865 euroko irabazia lortu dute. Biltzar jauregiak Gipuzkoan izan duen eragin ekonomikoa 53 milioi eurokoa izan dela plazaratu dute.
2012. urtean bost azoka egingo dituzte Kursaalen: Korrikalariena, Stockarena, Sevatour, San Sebastian Gastronomika eta Gipuzkoako ezkontzena.
