Bihar abiatuko da Gaztemaniak, Inoren ero ni eta Willis Drummond taldeek Gasteszenan emango duten kontzertuarekin

Estitxu Zabala

2012/02/29

Willis Drummond taldea. (Argazkia: Musikazuzenean.com)

Aldundia, Haur, Nerabe eta Gazteen Sustapen Zerbitzua eta Gipuzkoako 5 udalen arteko musika programa da Gaztemaniak. Urtero berritzen duten hitzarmenari esker, aurten ere, Donostian, Arrasaten, Hondarribian, Oñatin eta Zarautzen hainbat kontzertu izango dira. Aurtengo ekitaldia zalantzan egon da, arazo ekonomikoengatik, baina azkenean aurrera ateratzea lortu dute. 20 eta 30 urte bitarteko entzuleentzat zuzendutako kontzertuek osatzen dute egitaraua, eta talde ausartak, desberdinak eta izaera esperimentala dutenak igotzen dira taula gainera. Beti talde nagusi bat izaten da protagonista, baina aurretik tokian tokiko talde gonbidatu batek jotzen du. Gainera, aurtengo berritasun gisa, kontzertu guztietarako sarrerak aldez aurretik Internet bidez erosteko aukera egongo da www.kulturalive.com webgunean. Aurtengo egitarauak 13 kontzertu izango ditu, baina oraindik guztiak ez daude zehaztuak. Edonola ere, jakina da horietako bost kontzertu Donostian izango direla, Gazteszenan, Intxaurrondo kultur etxean eta Kontadoresen. Egitarauari ekiteko lehen kontzertua, Donostian izango da, bihar bertan, Egiako Gazteszenan; bertan, Inoren Ero Ni eta Willis Drummond taldeek joko dute.