Jose Luis Olaizolak Troa literatur saria irabazi du
Idazle donostiarrak haur prostituzioari buruz idatzitako ‘La niña del arrozal’ eleberria saritu dute
Gizarte hobea lortzeko eta pertsona hobeak izaten laguntzen duen literatura saritzen dute Troa sariek. Jose Luis Olaizolak (Donostia, 1927) eskuratu du aurtengo sari nagusia, La niña del arrozal lanagatik. Haur prostituzioari buruzko obra da, eta Maite Castillo epaimahaikidearen ustez, Olaizolaren lanak haur prostituzioa salatu egiten du eta haren aurka egiteko garrantzia azpimarratzen du.
Olaizola Somos Uno gobernuz kanpoko erakundearen presidentea da. Elkarteak Tailandian lan egiten du haur prostituzioaren aurka. Idazleak aitortu du La niña del arrozal bere obra kuttunena dela.
Olaizolak hainbat sari eskuratu ditu bere literatur ibilian. Sevillako Ateneo saria (1976), Planicio obrarengatik; Barco de Vapor Saria (1982) Cucho liburuarengatik; eta Planeta Saria (1983) La guerra del general Escobar obrarengatik. Troa Literatur Sariak ekainaren 7an banatuko dituzte.
